یہ صفحہ دوست کو ای میل کیجیئے		پرِنٹ کریں

بھجو نے ابھی کچھ خاص نہیں کر دکھایا ہے

بھارتی کپتان سورو گانگولی نے کہا ہے کہ آسٹریلیا کے خلاف ٹیم کی کامیابی کے لئے سپِنر ہربھجن سنگھ کو اپنی کارکردگی میں بہتری لانے کی ضرورت ہے۔

آسٹریلیا کے ساتھ برسبین میں کھیلے جانے والے پہلے ٹیسٹ میں ہربھجن سنگھ کی کارکردگی کچھ زیادہ اچھی نہیں تھی۔ بھارت کو بارش سے متاثر اس ٹیسٹ میچ میں آسٹریلیا پر کچھ مدت کے لئے برتری حاصل تو تھی تاہم ہربھجن سنگھ نے میچ میں ایک سو انہتر رن دے کر صرف ایک وکٹ حاصل کیا۔

کپتان گانگولی نے کہا کہ ’وہ ایک بہت ہی عمدہ کھلاڑی ہیں، تاہم ہر کسی کی طرح ان کے لئے بھی کوئی میچ ایسا ہو سکتا ہے۔‘

انہوں نے مزید کہا کہ ’میں چاہتا ہوں کہ وہ بہتر کارکردگی دکھائیں کیونکہ وہ ایک وکٹ۔ٹیکر ہیں۔ اگر ہمیں کامیاب ہونا ہے تو انہیں اس سے بہتر بولنگ کرنی ہوگی۔‘

ماضی میں ہربھجن سنگھ کا آسٹریلیا کے خلاف اچھا ریکارڑ رہا ہے۔ بھارت کے پچھلے دورے پر آسٹریلیا کو سیریز کی شکست ہوئی تھی اور اس میں ہربھجن سنگھ کا نمایاں کردار تھا۔

موجودہ سیریز کا دوسرا ٹیسٹ ایڈلیڈ میں ہونے والا ہے اور یہاں کی وکٹ ہربھجن سنگھ کے لئے فارم میں واپس آنے کے لئے سڈنی کے بعد موزون ترین پچ ہے۔