ریو اولمپکس کا دسواں دن، برازیل کا عالمی ریکارڈ

ریو اولمپکس کے دسویں دن جہاں برازیل نے پول والٹ مقابلوں میں اولمپکس میں اپنا پہلا تمغہ جیتا وہیں بہاماس کی شانی ملر نے گولڈ میڈل کے لیے سر دھڑ کی بازی لگا دی۔

٭ آؤ ریو چلیں: اولمپکس پر بی بی سی اردو کا خصوصی ضمیمہ

برازیل کے تیاگو براس ڈی سلوا نے بارش سے متاثرہ پول والٹ کے مقابلے میں 6.03 میٹر اونچی جست لگا کر نیا عالمی ریکارڈ بھی قائم کیا۔

یہ ریو میں برازیل کا دوسرا طلائی تمغہ ہے۔

آخری جست

عورتوں کی چار سو میٹر کی دوڑ میں اس وقت ڈرامائی مناظر دیکھنے میں آئے جب بہاماس سے تعلق رکھنے والی شانی ملر نے اپنے آپ کو فنش لائن پر گرا کر امریکی ایتھلیٹ ایلیسن فیلیکس کو پیچھے چھوڑ دیا۔

شانی ملر نے یہ فاصلہ 49.44 سیکنڈ میں طے کیا۔

ایتھلیٹکس میں ہی کینیا کے ڈیوڈ روڈیشا نے بارش سے متاثرہ مقابلے میں اپنے 800 میٹر کے اعزاز کا دفاع کرتے ہوئے اپنے ہم وطن حریف ایلفریڈ کِپکیٹر کو پیچھے چھوڑ دیا۔

بحرین کی روتھ جیبیت نے عورتوں کی تین ہزار میٹر کی سٹیپل چیز میں نہ صرف سونے کا تمغہ جیتا بلکہ اس دوڑ کی تاریخ میں دوسرا تیز ترین ریکارڈ اپنے نام کر لیا۔

کُشتی کے مقابلے میں کیوبا کے میہین لوپیس نونیس نے ترکی کے رضا کایالپ کو شکست دے کر طلائی تمغہ حاصل کیا۔ یہ ریو میں ان کا تیسرا طلائی تمغہ ہے۔

شارلٹ ڈوژاڈن کے طلائی تمغے کی بدولت ریو میں برطانیہ کے طلائی تمغوں کی تعداد 16 تک پہنچ گئی ہے۔

ڈوژاڈن نےگھڑ سواری میں برطانیہ کے لیے سونے کا تمغہ جیتا۔ وہ اولمکپس مقابلوں میں تین طلائی تمغے جیتنے والی دوسری خاتون ہیں۔

دسویں دن کے اختتام پر امریکہ 26 طلائی تمغوں کے ساتھ بدستور سرِ فہرست ہے، جب کہ برطانیہ 16 طلائی تمغوں کے ساتھ دوسرے نمبر پر آ گیا ہے اور چین 15 طلائی تمغوں کے ساتھ تیسرے نمبر پر ہے۔

ریو میں بارش

ادھر ریو میں شام کے وقت بارش سے کئی کھیل متاثر ہوئے۔ مردوں کی 110 میٹر کی رکاوٹوں کی دوڑ کو تیز بارش کے باعث ملتوی کرنا پڑا۔ اسی طرح مردوں کے پول والٹ اور عورتوں کے ڈسکس تھرو کے مقابلے بھی بارش کی زد میں آ گئے۔

کشتی رانی کے مقابلے بھی ہواؤں کی وجہ سے متاثر ہوئے۔ بارش کے باعث تماشائیوں کی تعداد میں بھی خاصی کمی دیکھنے میں آئی۔