پوکے مون گو کھیلنے پر 3700 ڈالر کا بل

جاپان سے تعلق رکھنے والے جمناسٹک اولمپیئن کوہیے اوچیمیرا نے برازیل کے شہر ریو میں پوکے مون گو گیم کھیلی جس کی وجہ سے ان کے موبائل فون کا بل 3700 امریکی ڈالر آگیا۔

27 سالہ اوچیمیرا 2012 کے لندن اولمپکس سمیت اب تک پانچ بار جمناسٹک مقابلوں میں ایک گولڈ میڈل اور چار سلور میڈل حاصل کر چکے ہیں۔

خیال رہے کہ ورچوئل ریئلٹی پر مبنی گیم پوکے مون گو 30 سے زائد ممالک میں دستیاب ہے اور زبردست مقبولیت حاصل کر چکی ہے۔

جب اوچیمیرا اولمپک مقابلوں میں شرکت کے لیے جاپان سے برازیل پہنچے تو موبائل فون رومنگ پر ہونے کی وجہ سے بل موصول ہونے پر انھیں دھچکا لگا۔

کینزو شیرائی جو کہ ان کی ٹیم میں شامل ہیں بتاتے ہیں کہ جس دن اوچیمورا کو اپنے فون کا بل ملا اس دن کھانے کی میز پر وہ بالکل بے دم لگ رہے تھے۔

تاہم متعلقہ فون کمپنی نے اس بات پر رضامندی ظاہر کی ہے کہ وہ ان سے ’ڈیلی فلیٹ ریٹ‘ پر بل لیں گے۔

اس کا مطلب یہ ہے کہ اوچیمیرا جو کہ اس وقت اپنا ٹائٹل دوبارہ جیتنے کے لیے فیورٹ ہیں ملک سے باہر ہونے کے باعث اب روزانہ کی بنیاد پر 3700 امریکی ڈالر کے بجائے 22 امریکی ڈالر موبائل بل ادا کریں گے۔

جاپانی خبر رساں ادارے کیوڈو سے گفتگو میں چھ مرتبہ عالمی چیمپیئن کا اعزاز حاصل کرنے والے اوچیمیرا نے بتایا کہ میں واقعی بہت خوش قسمت ہیں۔