’عامر بولنگ کرنا جانتا ہے‘

سپاٹ فکسنگ کے الزام میں سزا یافتہ پاکستانی کرکٹر محمد عامر آج کل سوشل میڈیا پر موضوعِ بحث ہیں جنھیں ٹیم میں شامل کرانے کے لیے ٹوئٹر پر ٹرینڈ چلایا گیا ہے۔

’محمد عامر کو واپس لائیں گے‘ عنوان سے ٹاپ ٹرینڈ میں مختلف لوگ محمد عامر کو کرکٹ ٹیم میں واپس لانے کے لیے ٹویٹس کر رہے ہیں۔

<link type="page"><caption> محمد عامر کی سلیکشن پر غور کر رہے ہیں: شہریار</caption><url href="http://www.bbc.com/urdu/sport/2015/12/151203_amir_selection_zzk.shtml" platform="highweb"/></link>

<link type="page"><caption> ’سزایافتہ کرکٹروں کی فوری واپسی نہیں ہوگی‘</caption><url href="http://www.bbc.com/urdu/sport/2015/08/150825_amir_asif_butt_return_rwa" platform="highweb"/></link>

<link type="page"><caption> ’ایسے کھلاڑی کے ساتھ نہیں کھیل سکتا جس نے ملک کو بدنام کیا ہو‘</caption><url href="http://www.bbc.com/urdu/sport/2015/11/151120_hafeez_refuse_to_play_aamir_rwa" platform="highweb"/></link>

منیب احمد نے ٹویٹ کی کہ ’گذشتہ روز محمد عامر نے 140 کلومیٹر کی رفتار سے تسلسل کے ساتھ بولنگ کی، تو جلنے والے جلیں گے۔‘

احتشام وڑائچ نے لکھا کہ ’دوسرے لوگ یعنی بنگالی انھیں خوشی سے قبول کر رہے ہیں اور ہم پاکستانی یہ بات لے کر بیٹھے ہیں کہ اس نے قوم کو دھوکہ دیا ہے۔‘

بھارتی کرکٹر سنجے منجریکر نے محمد عامر کی تعریف کرتے ہوئے لکھا: ’عامر غیرمعمولی کلائی کے مالک فاسٹ بولر ہیں، یہ ایک ایسی چیز ہے جو ان کے علاوہ وسیم اور وقار کو بھی عطا ہوئی تھی۔ سب کچھ ایک جانب، یہ لڑکا محمد عامر بولنگ کرنا جانتا ہے۔‘

فرید علی نے محمد حفیظ کی جانب سے محمد عامر کو واپس کھلائے جانے کے اعتراض پر تنقید کرتے ہوئے لکھا کہ ’محمد عامر نے اپنے آپ کو ثابت کیا ہے۔ حفیظ کا اپنی کارکردگی کے بارے میں کیا خیال ہے؟‘

امین خان نے لکھا ’کہ محمد عامر زبردست کھلاڑی ہیں،‘ جبکہ اسد نے کہا: ’عامر نے اپنی سزا پوری کر لی ہے اور اب وہ اچھی کارکردگی دکھا رہے ہیں۔ وہ پاکستان کے لیے کامیابی کی علامت بن سکتے ہیں۔‘

عامر سہیل نے لکھا کہ ’عامر کو اپنے آپ کو ثابت کرنے کا موقع ملنا چاہیے۔‘ جبکہ اشتیاق احمد کا خیال تھا کہ ’توبہ کرنے کے لیے دیر کبھی نہیں ہوتی۔‘

یاد رہے کہ پاکستان کرکٹ بورڈ کے چیرمین شہریار خان نے محمد عامر کی موجودہ کارکردگی پر مکمل اطمینان کا اظہار کرتے ہوئے کہا ہے کہ وہ ٹیم کا دروازہ کھٹکھٹا رہے ہیں۔

شہریار خان کا کہنا تھا کہ محمد عامر کو آئندہ ٹیم میں لانے پر غور ہو رہا ہے۔ انھوں نے کہا کہ اس کے لیے ضروری ہے کہ محمد عامر کو سینیئر کھلاڑیوں کے ساتھ بٹھا کر سمجھایا جائے گا کہ اگر آپ ٹیم میں واپس آتے ہیں تو آپ کے رویے میں انکساری ہونی چاہیے کیونکہ لوگ آپ کے رویے کو دیکھیں گے۔