کوارٹر فائنل میں ہوگا لیفٹ آرم فاسٹ بولرز کا مقابلہ

پاکستان کے سابق لیفٹ آرم فاسٹ بولر وسیم اکرم کو اس بات کی خوشی ہے کہ وہ پاکستان اور آسٹریلیا کے درمیان کوارٹرفائنل میں بائیں ہاتھ سے گیند کرانے والے فاسٹ بولرز کی خاصی تعداد کو کھیلتا دیکھیں گے۔

پاکستان اور آسٹریلیا کے درمیان ورلڈ کپ کا کوارٹرفائنل جمعے کو ایڈیلیڈ میں کھیلا جارہا ہے جس میں آسٹریلوی ٹیم میں تین لیفٹ آرم فاسٹ بولرز مچل جانسن، مچل اسٹارک اور جیمز فاکنر شامل ہیں۔

پاکستانی ٹیم میں بائیں ہاتھ سے بولنگ کرنے والے راحت علی اور وہاب ریاض شامل ہیں۔

مچل اسٹارک اس ورلڈ کپ میں 16 وکٹیں حاصل کرچکے ہیں۔ مچل جانسن کی نو اور جیمز فاکنر کی تین وکٹیں ہیں۔

پاکستانی بولرز میں وہاب ریاض 14 وکٹوں کےساتھ قابل ذکر ہیں جبکہ محمد عرفان اور راحت علی کی آٹھ آٹھ وکٹیں ہیں۔

وسیم اکرم کا کہنا ہے کہ جب وہ کھیلتے تھے تو اس وقت انہیں بہت ہی کم بائیں ہاتھ کے فاسٹ بولرز دکھائی دیتے تھے لیکن اب صورتحال مختلف ہے۔

انھوں نے کہا کہ بائیں ہاتھ سے بولنگ کرنے والے موجودہ بولرز میں انھیں مچل اسٹارک پسند ہیں۔ ان کا قد لمبا ہے اور وہ گیند سوئنگ کرتے ہیں اسی لیے کامیاب ہیں۔

وسیم اکرم نے کہا کہ مچل جانسن مچل اسٹارک اور عرفان کو بولنگ کرتا دیکھ کر نوجوانوں میں لیفٹ آرم فاسٹ بولر بننے کا شوق بڑھا ہے۔

سابق کپتان نے اس ورلڈ کپ میں15 وکٹیں حاصل کرنے والے نیوزی لینڈ کے فاسٹ بولر ٹرینٹ بولٹ کی تعریف کی۔

انھوں نے پاکستانی بولرز کے بارے میں کہا کہ محمد عرفان کو اپنی فٹنس پر خاص توجہ دینے کی ضرورت ہے۔ وہاب ریاض نے زمبابوے، جنوبی افریقہ اور آئرلینڈ کے خلاف عمدہ بولنگ کی ہے۔وہاب ریاض کا سب سے بڑا مسئلہ کلائی کا تھا لیکن اب انھوں نے اس مسئلے پر قابو پالیا ہے جس کی وجہ سے وہ بہتر انداز میں ان سوئنگ کرنے لگے ہیں۔