پاکستانی بیٹسمینوں کا مسئلہ ہے کیا؟

پاکستانی کرکٹ ٹیم کے بیٹنگ کوچ گرانٹ فلاور کہتے ہیں کہ بیٹسمینوں کو بڑا سکور کرنا ہوگا ورنہ پاکستانی ٹیم ورلڈ کپ میں زیادہ آگے نہیں جاسکے گی۔

یاد رہے کہ اس ورلڈ کپ میں پاکستانی ٹیم صرف متحدہ عرب امارات کے خلاف 300 سے زائد رنز بنانے میں کامیاب ہو سکی ہے۔

گرانٹ فلاور نے بی بی سی اردو سروس کے اس سوال پر کہ پاکستانی بیٹسمینوں کا مسئلہ کیا ہے کہا کہ ہر بیٹسمین مختلف نوعیت کے مسئلے سے دوچار ہے۔ کچھ ذہنی طور پر مضبوط نہیں کچھ کا مسئلہ تکنیکی ہے اور کچھ دباؤ کا شکار ہو جاتے ہیں۔

گرانٹ فلاور کو امید ہے کہ پاکستانی بیٹسمین بڑا اسکور کرنے میں کامیاب ہوں گے۔

انھوں نے کہا کہ بیٹسمینوں کو خود بھی اس بات کا اچھی طرح احساس ہے کہ ٹیم ان سے اچھی کارکردگی کی توقع رکھے ہوئے ہے۔گرانٹ فلاور نے کہا کہ پاکستانی بیٹسمینوں نے جنوبی افریقہ کے مضبوط بولنگ اٹیک کےخلاف بھی بہتر بیٹنگ کی، لہٰذا وہ اب خاصے پراعتماد اور مثبت دکھائی دے رہے ہیں۔

پاکستانی ٹیم کے بیٹنگ کوچ نے بتایا کہ سرفراز احمد ابتدا میں تگ ودو کر رہے تھے لیکن بعد میں وہ فارم میں آگئے اور اچھی بیٹنگ کی اور جنوبی افریقی بولروں کےخلاف فٹ ورک کا صحیح استعمال کرتے ہوئے جارحانہ بیٹنگ کی۔

گرانٹ فلاور نے کہا کہ پاکستانی بیٹسمینوں کی ٹیسٹ کرکٹ میں کارکردگی بہت اچھی رہی ہے البتہ ون ڈے میں انھیں بہتری لانی ہوگی۔

فلاور نے کہا کہ صہیب مقصود اور عمراکمل نے اپنے ٹیلنٹ کی جھلک ضرور دکھائی ہے لیکن انھیں یہ ثابت کرنے کے لیے کہ وہ بہت باصلاحیت ہیں بہت کچھ کر کے دکھانا ہو گا۔