ناخوش کلبوں کو کوئی معاوضہ نہیں دیا جائے گا: فیفا

فٹ بال کی عالمی تنظیم فیفا کا کہنا ہے کہ وہ اُن فٹ بال کلبوں اور لیگز کو معاوضہ ادا نہیں کرے گا جو سنہ 2022 کے قطر میں منقعد ہونے والے ورلڈ کپ کے نومبر اور دسمبر کے مہینوں میں ممکنہ انعقاد سے ناخوش ہیں۔

تنظیم کا کہنا ہے کہ ٹورنامنٹ کے اوقاتِ کار میں تبدیلی پر معافی مانگنا بھی ضروری ہے۔ واضح رہے کہ ورلڈ کپ کی تاریخوں میں تبدیلی سے کئی لیگ میچز متاثر ہوں گے۔

فیفا کی ٹاسک فورس نے تجویز کیا تھا کہ قطر میں 2022 میں کھیلے جانا والا فیفا ورلڈ کپ گرمی کے باعث کھلاڑیوں اور شائقین کو درپیش خطرات کو مدِ نظر رکھتے ہوئے نومبر اور دسمبر میں منعقد کیا جائے۔

فیفا کے سیکرٹری جنرل جیروم ویلکے کا کہنا تھا ’کوئی معاوضہ نہیں دیا جائے گا۔ چیزوں کی تنظیمِ نو کے لیے سات سال باقی ہیں۔‘

فیفا کی ایگزیکٹو کمیٹی ٹاسک فورسز کی تجویز کی منظوری کے لیے اگلے ماہ زیورخ میں میں ملاقات کرے گی۔

فیفا کے سیکرٹری جنرل کا کہنا ہے کہ سنہ 2022 کے ورلڈ کپ کا فائنل 23 دسمبر کو ہونے کا امکان ہے۔

پریمیئر لیگ کے چیف ایگزیکٹو رچرڈ سکڈمور کا کہنا ہے کہ فائنل میچ کا کرسمس کے اتنے قریب ہونا کلب کے روایتی پروگرام کے ساتھ متصادم ہوگا اور بےچینی کا سبب بنے گا۔

جیروم ویلکے کا کہنا ہے کہ یورپ کی گورننگ باڈی یو ای ایف اے اور دوسری تنظیمیں جمعہ 23 دسمبر کے لیے کافی خواہش مند ہیں تاہم 18دسمبر کی تاریخ بھی ممکن ہے۔

بدھ کو دوحا میں نیوز کانفرنس سے خطاب کرتے جیروم ویلکے نے تسلیم کیا کے صورتحال بہترین نہیں تھی لیکن ان کا مزید کہنا ہے ’ہم معاوضے کی بات کیوں کر رہے ہیں؟ یہ صرف ایک بار ہو رہا ہے ، ہم فٹ بال کو تباہ نہیں کر رہے۔‘

’ہم کلبوں سے معافی کیوں مانگیں؟ ہم نے کلبوں کے ساتھ معاہدہ کیا ہے کہ وہ استفادہ حاصل کرنے والوں میں شامل ہوں گے۔ سنہ 2010 میں چار کروڑ ڈالر تھے اور سنہ 2014 میں سات کروڑ ڈالر۔ ہم تمام لوگوں کو ورلڈ کپ کے کھیل اور اس کے اقتصادی نتائج میں شامل کر رہے ہیں۔‘