فیفا: بدعنوانی سے متعلق رپورٹ شائع کرنے پر اتفاق

فٹبال کے عالمی ادارے فیفا کے عہدیداران نے متفقہ طور پر فیصلہ کیا ہے کہ وہ فٹ بال ورلڈ کپ کی میزبانی سے متعلق بولی کے معاملے میں مبینہ بدعنوانی سے متعلق رپورٹ کو شائع کریں گے۔

فیفا کے منتظمین نے اس بات پر اتفاق کیا کہ 430 صفحات پر مبنی یہ رپورٹ ابھی مرتب کیے جانے کے مراحل میں ہے۔

یہ رپورٹ اس وقت شائع کی جائے گی جب چار افراد سے جاری تفتیش مکمل ہوگی اور امکان ہے کہ اسی بہت زیادہ احتیاط سے مرتب کیا جائے گا تاکہ ان افراد کی شناخت کو صیغۂ راز میں رکھا جا سکے۔

رپورٹ کو شائع کرنے متعلق فیصلہ فیفا کی پالیس میں تبدیلی کو ظاہر کرتا ہے جس نے ابتدا میں اس رپورٹ کو ظاہر کرنے کے مطالبے کو رد کر دیا تھا۔

کچھ عرصے قبل فٹبال کے ورلڈ کپ 2018 اور 2022 کی میزبانی کے سلسلے میں بدعنوانی کے مزید الزامات سامنے آئے تھے۔

دا ہاؤز آف کامنز میں ثقافتی میڈیا اور کھیل کی نمائندہ کمیٹی نے اس بارے میں جو رپورٹ شائع کی اس میں یہ دعویٰ کیا گیا کہ سنہ 2018 میں انگلینڈ میں فٹبال ورلڈ کپ منعقد کروانے کے لیے بولی لگانے والوں نے اپنے حریف ممالک کی سرگرمیوں کی جاسوسی کی تھی۔

واضح رہے کہ روس اور قطر کو بالترتیب سنہ 2018 اور 2022 میں عالمی ورلڈ کپ منعقد کرنے کی ذمہ داری ملی تھی۔

سنڈے ٹائمز کے ذریعے دی جانے والی معلومات میں یہ بات بھی شامل ہے کہ کس طرح انگلینڈ کی دعویداری کے لیے افواہوں اور انٹیلی جنس کی بنیاد پر ایک ڈیٹا بیس تیار کیا گیا تھا اور یہ معلومات نجی کمپنیوں اور بطور خاص برطانوی سفارت خانوں سے حاصل کی گئی تھی۔

تاہم اخبار نے کوئی واضح شواہد فراہم نہیں کیے۔ اس کے بجائے رپورٹ میں ووٹوں کے مبینہ طور پر خریدے جانے اور فٹبال کے ادارے فیفا کے قوانین سے فائدہ اٹھانے کی تفصیلات ہیں۔

رپورٹ میں کہا گیا ہے کہ روسی صدر پوتن نے اپنے ملک کے لیے میزبانی کا حق حاصل کرنے میں اہم کردار ادا کیا، یہاں تک کہ فیفا کے صدر سیپ بلیٹر کی خدمات بھی حاصل کی گئیں تاکہ وہ ووٹ لینے کے لیے لابی انگ کر سکیں۔

ایک دوسرے دعوے میں کہا گیا ہے کہ روس نے یوروپیئن فٹبال ایسوسی ایشن کے صدر مائیکل پلاٹینی کی حمایت حاصل کرنے کے لیے بھی راہ ہموار کی کیونکہ پلاٹینی کا بھی اس میں ایک ووٹ تھا۔ ان کی مبینہ حمایت حاصل کرنے کے لیے انھیں مشہور مصور پکاسو کی ایک پینٹنگ دی گئی۔

اسی طرح قطر پر بھی الزام ہے کہ اس نے کس طرح اپنے پیٹرول کی صنعت کی وجہ سے دو طرفہ تعلقات کے تحت سنہ 2022 میں ہونے والے فٹبال ورلڈ کپ کی میزبانی حاصل کرنے میں کامیابی حاصل کی۔