’اولین ترجیح مثبت کرکٹ کھیلنا اور جیتنا ہے‘

پاکستان کرکٹ ٹیم کے ہیڈ کوچ وقار یونس نے کہا ہے کہ وہ مثبت رویے کے ساتھ ٹیم میں واپس آئے ہیں اور وہ آئندہ برس سے شروع ہونے والے عالمی کپ سے پہلے ٹیم میں زیادہ جوش پیدا کرنا چاہتے ہیں۔

لاہور میں منگل کو صحافیوں سے بات کرتے ہوئے انھوں نے کہا کہ ان کی اولین ترجیح مثبت کرکٹ کھیلنا اور جیتنا ہے اور اس میں دفاعی حکمتِ عملی کی گنجائش نہیں ہے اور انھیں امید ہے کہ لڑکے اس بات کو سمجھیں گے۔

وقار یونس نے اس بات کو تسلیم کیا کہ ماضی میں ان سے کچھ غلطیاں ہوئیں تاہم انھوں نے ان سے سبق سیکھا ہے۔

پاکستان کرکٹ بورڈ کے ہیڈ کوچ کا کہنا تھا کہ ہر خاندان میں کوئی نہ کوئی مشکلات ہوتی ہیں تاہم اچھا کوچ وہ ہوتا ہے جو ان مشکلات پر قابو پا کر کھلاڑیوں کو متحد رکھتا ہے۔

وقار یونس کے مطابق پاکستان کی کرکٹ ٹیم عالمی کپ شروع ہونے سے قبل سری لنکا، آسٹریلیا اور نیوزی لینڈ کے خلاف میچ کھیلے گی جس سے اسے عالمی کپ کی تیاری میں مدد ملے گی۔ خیال رہے کہ وقاریونس اس سے قبل مارچ سنہ 2010 میں کوچ بنائے گئے تھے اور ان کے دور میں پاکستانی ٹیم نے سنہ 2010 کے ورلڈ ٹی ٹوئنٹی اور سنہ 2011 کے عالمی کپ کے سیمی فائنل کھیلے تھے جبکہ جنوبی افریقہ اور ویسٹ انڈیز کے خلاف ٹیسٹ سیریز ڈرا کی تھی اور نیوزی لینڈ کو ٹیسٹ سیریز میں ہرایا تھا۔

وقار یونس نے اگست سنہ 2011 میں ذاتی وجوہات کی بنا پر کوچ کے عہدے سے استعفیٰ دے دیا تھا لیکن ویسٹ انڈیز کے دورے میں ان کے دیگر کھلاڑیوں کے ساتھ اختلافات کھل کر سامنے آئے تھے۔