کپتانی پر نہیں، کارکردگی پر توجہ ہے: مصباح

پاکستان کرکٹ ٹیم کے کپتان مصباح الحق کا کہنا ہے کہ ٹیم کا کپتان بنانا کرکٹ بورڈ کا معاملہ ہے اور وہ کپتانی سے قطع نظر اپنی کارکردگی پر توجہ مرکوز رکھتے ہیں۔

قذافی سٹیڈیم لاہور میں لگے فٹنس کیمپ میں صحافیوں سے بات کرتے ہوئے اس سوال پر کہ شاہد آفریدی بھی کپتانی کے خواہش مند ہیں، مصباح الحق کا جواب تھا کہ ان کی ترجیح فٹنس اور کارکردگی ہے، اور کپتان کون ہوتا ہے اس کا فیصلہ کرکٹ بورڈ ہی کرتا ہے۔

مصباح الحق کے مطابق سری لنکا کے خلاف سیریز تک فاسٹ بالر محمد عرفان کا فٹ ہونا پاکستان کی ٹیم کے لیے بہت ضروری ہے کیونکہ محمد عرفان پاکستانی ٹیم کے پاس ایک مہلک ہتھیار ہے۔

مصباح الحق نے مزید کہا کہ محمد عرفان دنیا کے باقی بولروں سے مختلف ہیں اور اس کی بولنگ سے میچ کا پانسا پلٹا جا سکتا ہے اس لیے اگلی سیریز تک اس کا فٹ ہونا پاکستان کی ٹیم کے لیے بہت سود مند ہو گا۔

اس سوال پر کہ وقار یونس کو دوبارہ کوچ بنائے جانے پر کچھ حلقوں کی جانب سے تنقید کی جا رہی ہے، مصباح الحق کا کہنا تھا کہ وقار یونس کی پاکستان کی ٹیم کے ساتھ وفاداری پر کوئی سوال نہیں اٹھایا جا سکتا، جب وہ پہلے کوچ تھے تو پاکستان کی ٹیم نے بہت اچھی کارکردگی دکھائی۔

انھوں نے کہا کہ ان کے دور میں اظہر علی اور اسد شفیق جیسے کئی نوجوان کھلاڑی ٹیم میں آئے، تو وقار یونس نے جو بھی کام کیے وہ کافی زبردست رہے چاہے وہ پاکستان کی ٹیم کی کارکردگی کے حوالے سے ہوں یا انفرادی طور پر کھلاڑیوں کو بنانے کے سلسلے میں۔

مصباح الحق کے مطابق وقار جس طرح جوش و جذبے سے پاکستان کی ٹیم کے لیے کام کرتے ہیں انھیں یقین ہے کہ اس بار بھی ان کی کوچنگ میں ٹیم اچھی کارکردگی دکھائے گی۔

مصباح الحق نے کہا کہ ابھی تک انھیں سینٹرل کانٹریکٹ کی تفصیلات کا علم تو نہیں کہ اس میں کیا شقیں ہیں لیکن اگر اس میں فٹنس کو کانٹریکٹ کے لیے مشروط قرار دیا گیا ہے تو یہ بہت اچھی بات ہو گی اور اسی سے ہمارے اندر پیشہ ورانہ سوچ پیدا ہو گی اور یہ کھلاڑیوں کے لیے بھی فائدہ مند ہے اور ٹیم کے لیے بھی کیونکہ فٹنس بہتر ہو گی تو کارکردگی بھی بہتر ہو گی۔

لاہور میں لگے فٹنس کیمپ کے حوالے سے مصباح الحق کا کہنا تھا کہ اس کیمپ کا اصل مقصد کھلاڑیوں کی فٹنس کو بہتر بنانا تھا جبکہ اس میں تکنیکی پہلوؤں پر زیادہ کام نہیں کیا گیا، لیکن اگست میں سری لنکا کے خلاف سیریز سے پہلے جو کیمپ لگایا جائے گا اس میں خاص طور پر خامیوں کو تکنیکی طور پر درست کرنے پر بھی کام کیا جائے گا۔