پاکستان انڈر19 ورلڈ کپ کے فائنل میں پہنچ گیا

متحدہ عرب امارات میں کھیلے جانے والے آئی سی سی انڈر 19 کرکٹ ورلڈ کپ کے پہلے سیمی فائنل میں پاکستان نے انگلینڈ کو تین وکٹوں سے شکست دے دی ہے۔

دبئی میں پیر کو کھیلے جانے والے میچ میں انگلینڈ نے فتح کے لیے پاکستانی ٹیم کو 205 رنز کا ہدف دیا جو اس نے آخری اوور میں حاصل کر لیا۔

<link type="page"><caption> تفصیلی سکور کارڈ</caption><url href="http://www.icc-cricket.com/u19-world-cup/match/u19cwc-2014/52" platform="highweb"/></link>

اس میچ میں پاکستان کا ٹاپ آرڈر ناکام رہا لیکن مڈل آرڈر میں سعود شکیل اور امیر حمزہ اور پھر آخر میں ظفر گوہر اور عماد بٹ نے اہم شراکتیں قائم کر کے ٹیم کو فتح دلوائی۔

پاکستان کے آؤٹ ہونے والے ابتدائی بلے بازوں میں کپتان سمیع اسلم، امام الحق، حسن رضا اور کامران غلام شامل تھے۔

اس ٹورنامنٹ میں چار مرتبہ سو رنز سے زیادہ کی شراکت بنانے والے سمیع اسلم اور امام الحق اس بار بالترتیب 18 اور 28 رنز ہی بنا سکے۔

57 کے سکور پر چار وکٹیں گرنے کے بعد سعود شکیل اور امیر حمزہ نے 50 رنز سے زیادہ کی شراکت قائم کر کے ٹیم کو سہارا دیا۔ اس شراکت کا خاتمہ سائر نے امیر حمزہ کو آؤٹ کر کے کیا۔

سعود شکیل نے 45 رنز کی اننگز کھیلی اور انھیں فشر نے وکٹوں کے پیچھے کیچ کروایا جبکہ سیف اللہ خان کوئی رن نہ بنا سکے۔

اس کے بعد اٹھویں وکٹ کے لیے ظفر گوہر اور عماد بٹ نے 63 رنز کی ناقابلِ شکست شراکت قائم کر کے پاکستان کی شکست کو فتح میں تبدیل کر دیا۔

ظفر 37 اور عماد 36 رن بنا کر ناٹ آؤٹ رہے۔

انگلینڈ کی جانب سے فشر، سائر اور جونز نے دو، دو وکٹیں لیں۔

اس سے قبل انگلینڈ نے ٹاس جیت کر پہلے کھیلتے ہوئے مقررہ 50 اوورز میں سات وکٹوں کے نقصان پر 204 رنز بنائے۔

انگلینڈ کی جانب سے ٹیٹر سال اور فنچ نے اننگز کا آغاز کیا، لیکن یہ دونوں اوپنر بغیر کوئی رن بنائے آؤٹ ہوگئے۔

بعد میں آنے والے بلے بازوں میں رائن ہگنز اور ول روڈز عمدہ بلے بازی کی اور ٹیم کو ایک بہتر سکور تک پہنچنے میں مدد دی۔

ان دونوں نے نصف سنچریاں بنائیں۔ روڈز نے چار چوکوں اور ایک چھکے کی مدد سے 76 رنز بنائے اور آؤٹ نہیں ہوئے جبکہہ رائن ہگنز نے تین چوکوں کی مدد سے 54 رنز بنائے۔

پاکستان کی جانب سے ضیاالحق، کرامت علی اور ظفر گوہر نے دو دو وکٹیں حاصل کیں۔

ورلڈ کپ کے کوارٹر فائنل مقابلوں میں پاکستان نے سری لنکا جبکہ انگلینڈ نے دفاعی چیمپیئن بھارت کو شکست دی تھی۔

فائنل میں پاکستان کا مقابلہ جنوبی افریقہ اور آسٹریلیا کے مابین 26 فروری کو ہونے والے دوسرے سیمی فائنل کی فاتح ٹیم سے ہوگا۔