ٹی ٹوئنٹی میں عمر گل سال کے بہترین کھلاڑی
انٹرنیشنل کرکٹ کونسل نے عالمی کرکٹ کے مختلف زمروں میں سال کے بہترین کھلاڑیوں کے ناموں کا اعلان کر دیا ہے جس کے مطابق ٹی ٹوئنٹی میں سال کی بہترین کارکردگی کے لیے پاکستان کے عمر گل کا انتخاب کیا گیا ہے۔
ٹی ٹوئنٹی میں سال کی بہترین کارکردگی کے لیے عمر گل کو مارچ سنہ 2013 میں جنوبی افریقہ کے خلاف بہترین بولنگ کی بنیاد پر نامزد کیا گیا تھا۔ اس ایوارڈ کے لیے تین دیگر کھلاڑی بھی نامزد کیے گئے تھے۔
آئی سی سی کی ویب سائٹ کے مطابق سال کے بہترین کرکٹر اور بہترین ٹیسٹ کرکٹر کا اعزاز آسٹریلوی کرکٹ ٹیم کے کپتان مائیکل کلارک کو ملا ہے۔ اس اعزاز کے لیے جنوبی افریقہ کے ہاشم آملہ اور بھارت کے مہندرا سنگھ دھونی کے علاوہ دیگر کئی کھلاڑیوں کو بھی نامزد کیا گیا تھا۔
بھارتی کرکٹ ٹیم کے کپتان مہندر سنگھ دھونی نے پیپلز چوئس ایوارڈ جیت لیا تھا۔ اس شعبے میں پاکستان سے کسی کھلاڑی کو نامزد نہیں کیا گیا تھا۔
سری لنکا کے بلے باز کمار سنگاکارا کو سال کے بہترین ون ڈے کرکٹر کا اعزاز دیا گیا ہے۔ اس ایوارڈ کے لیے پاکستانی ٹیم کے کپتان مصباح الحق اور سعید اجمل کو بھی نامزد کیا گیا تھا لیکن وہ یہ ایوارڈ جیتنے میں ناکام رہے۔
آئی سی سی کی طرف سے عالمی کرکٹ کے مختلف زمروں میں ایوارڈز کے لیے کھلاڑیوں کے ناموں کا اعلان جمعے کو بھارت کے شہر ممبئی میں کیا گیا۔
سال کے بہترین ابھرتے ہوئے کھلاڑی کا ایوارڈ بھارت کے کھلاڑی چیتشور پجارا کو ملا ہے۔ پاکستان سے کسی کھلاڑی کو اس ایوارڈ کے لیے نامزد نہیں کیا گیا تھا۔
امپائرنگ کے شعبے میں سال کی بہترین کارکردگی کے ایوارڈ کے لیے رچرڈ کیٹل برو منتخب کیے گئے ہیں۔ اس شعبے میں پاکستان کے امپائر علیم ڈار کو بھی نامزد کیا گیا تھا۔ وہ یہ ایوارڈ تین بار جیت چکے ہیں۔
