اسلام آباد: کرکٹ بورڈ کے چیئرمین کا انتخاب 2 نومبر کو کروانے کا حکم
اسلام آباد ہائی کورٹ نے پاکستان کرکٹ بورڈ کے چیئرمین کے لیے انتخاب نومبر کی دو تاریخ کو کروانے کا حکم دیا ہے۔
سرکاری میڈیا کے مطابق یہ حکم جسٹس شوکت عزیز صدیقی نے جاری کیا جو کہ پاکستان کرکٹ بورڈ کے چیئرمین کے انتخابات میں قواعدو ضوابط کی پاسداری نہ کیے جانے کے معاملے کی سماعت کر رہے ہیں۔
حکم میں یہ بھی کہا گیا ہے کہ دو نومبر کے بعد کوئی بھی نگراں سیٹ اپ کالعدم تصور ہوگا۔
عدالت نے کہا ہے کہ یہ الیکشن پاکستان کا الیکشن کمیشن کروائے گا اور پی سی بی اس سلسلے میں الیکشن کمیشن سے مکمل تعاون کرے۔
خیال رہے کہ پاکستان کرکٹ بورڈ کے انتظامات اس وقت ایک عبوری نگراں کمیٹی چلا رہی ہے جس کے سربراہ نجم سیٹھی ہیں۔
اسلام آباد ہائی کورٹ نے رواں برس مئی میں ذکاء اشرف کو پی سی بی کے چیئرمین کا عہدہ رکھنے سے روک دیا تھا اور ان کی تقرری کو ایک آلودہ فیصلہ قرار دیا تھا۔
اس کے بعد معروف صحافی نجم سیٹھی کو پاکستان کرکٹ بورڈ کا عبوری چیئرمین تعینات کیا گیا تاہم عدالت نے کہا تھا کہ ان کی تقرری بطور قائم مقام نہیں بلکہ نگراں چیئرمین ہے اور انہیں بورڈ سے متعلق کوئی بڑا فیصلہ کرنے کا اختیار نہیں۔
عدالت نے نجم سیٹھی کو90 دن میں پاکستان کرکٹ بورڈ کے الیکشن کرانے کے لیے بھی کہا تھا۔
یہ مدت اٹھارہ اکتوبر کو ختم ہونی تھی تاہم اس سے پہلے ہی پندرہ اکتوبر کو پاکستان کے وزیراعظم میاں نواز شریف نے نجم سیٹھی کی سربراہی میں ہی پاکستان کرکٹ بورڈ کا انتظام چلانے کے لیے پانچ رکنی ایڈہاک منیجمنٹ کمیٹی قائم کر دی تھی۔
اسی کمیٹی کے سربراہ کے طور پر نجم سیٹھی لندن میں آئی سی سی کے حالیہ اجلاس میں بھی شریک ہوئے تھے۔
