انگلینڈ اور بھارت کے درمیان چار ٹیسٹ میچوں پر مشتمل سیریز کا پہلا میچ پندرہ نومبر سے احمد آباد میں شروع ہو گا
برطانوی کرکٹ ٹیم کے بالر جیمز اینڈرسن نے کہا ہے کہ ان کی ٹیم کو ٹیسٹ کرکٹ کی عالمی درجہ بندی میں پہلے نمبر پر واپس لانے کے لیے ٹیم میں کیون پیٹرسن کی شمولیت ضروری ہے۔
انہوں نے کہا کہ ہم چاہتے ہیں کہ برطانیہ کی ٹیم ٹیسٹ کرکٹ کی عالمی درجہ بندی میں پہلے نمبر پر واپس آئے اور اس کے لیے ہمارے بہترین کھلاڑیوں کو عمدہ کاررگردگی دکھانا ہو گی اور پیٹرسن ان میں سے ایک ہیں۔
انگلینڈ اور بھارت کے درمیان چار ٹیسٹ میچوں پر مشتمل سیریز کا پہلا میچ پندرہ نومبر سے احمد آباد میں شروع ہو گا۔
اینڈرسن نے بی بی سی ریڈیو فائیو کو بتایا کہ ٹیم میں پیٹرسن کی شمولیت سے انھیں خوشی ہو گی۔
واضح رہے کہ بتیس سالہ پیٹرسن کو گزشتہ ماہ اُس وقت ٹیم سے نکال دیا تھا جب انہوں نے جنوبی افریقہ کے خلاف میچ کے دوران جنوبی افریقی کھلاڑیوں کو اپنی ٹیم اور بالخصوص کپتان اینڈریو سٹراس کے بارے میں ’اشتعال آنگیز‘ ٹیکسٹ پیغامات بھیجے تھے۔
کیون پیٹرسن نے جنوبی افریقہ کے کھلاڑیوں کو مبینہ طور پر اپنے ہی ملک کی ٹیم کے کھلاڑیوں پر تنقید پر مبنی تحریری پیغامات بھیجنے پر معافی مانگ لی تھی۔
بتیس سالہ کیون پیٹرسن انگلینڈ کی جانب سے اٹھاسی ٹیسٹ میچوں میں انچاس اعشاریہ چار آٹھ کی اوسط سے اکیس سنچریوں اور ستائیس نصف سنچریوں کی بدولت سات ہزار چھہتر رنز بنا چکے ہیں۔
پیٹرسن نے ایک سو ستائیس ایک روزہ میچوں میں اکتالیس اعشاریہ آٹھ چار کی اوسط سے نو سنچریوں اور تئیس نصف سنچریوں کی مدد سے چار ہزار ایک سو چوراسی جبکہ چھتیس ٹی ٹوئنٹی میچوں میں سینتیس اعشاریہ نو تین کی اوسط سے سات نصف سنچریوں کی مدد سے ایک ہزار ایک سو چھہتر رنز بنائے ہیں۔
