محمد حفیظ اس وقت پاکستانی کرکٹ ٹیم کے ٹی ٹوئنٹی سکواڈ کے کپتان ہیں
پاکستانی آل راؤنڈر محمد حفیظ ایک روزہ میچوں کے لیے آئی سی سی کے بہترین بولرز کی فہرست میں پہلے نمبر پر آ گئے ہیں۔
پیر کو آئی سی سی کی جانب سے جاری ہونے والی تازہ رینکنگ میں پاکستانی آف سپنر سعید اجمل چھ سو اٹھانوے پوائنٹس کے ساتھ تیسری درجے پر ہیں۔
ٹیسٹ میچوں کے بہترین بالرز کی فہرست میں بھی سعید اجمل آٹھ سو بتیس پوائنٹس کے ساتھ تیسرے درجے پر ہیں۔
محمد حفیظ کے اس وقت سات سو ستائیس پوائنٹس ہیں جبکہ جنوبی افریقہ کے بالر ٹیسٹاو سات سو پچیس پوائنٹس کے ساتھ پہلی سے دوسری پوزیشن پر آ گئے ہیں۔ دونوں بالرز کے درمیان صرف دو پوائنٹس کا فرق ہے۔
محمد حفیظ نے منگل سے آسٹریلیا کے خلاف تین ایک روزہ میچ کھیلنے ہیں جب کہ ٹیسٹاو نے بھی انگلینڈ کے خلاف منگل سے شروع ہونے والی سیریز میں حصہ لینا ہے۔
انگلینڈ کے فن چوتھی جبکہ جنوبی افریقہ کے مارکل پانچویں پوزیشن پر ہیں۔
ایک روزہ میچوں کے لیے آئی سی سی کے دس بہترین بلے بازوں میں پاکستان کا ایک کھلاڑی بھی شامل نہیں ہے لیکن ٹیسٹ میچ کے دس بہترین بلے بازوں کی فہرست میں یونس خان اور اظہر علی بلترتیب آٹھویں اور نویں پوزیشن پر فائز ہیں جب کہ پہلے درجے پر آٹھ سو بانوے پوائنٹس کے ساتھ سری لنکا کے سنگاکارا اور جنوبی افریقہ کے ہاشم عاملہ آٹھ سو انہتر پوائنٹس کے ساتھ دوسرے درجے پر ہیں۔
اس فہرست میں جنوبی افریقہ کے ہاشم عاملہ آٹھ سو اکہتر پوائنٹس کے ساتھ پہلے جب کہ بھارت کے کوہلی آٹھ سو اٹھاون پوائنٹس کے ساتھ دوسرے درجے پر ہیں۔
