گال ٹیسٹ: بابر اعظم کی شاندار سنچری سے پاکستان کی میچ میں واپسی
،تصویر کا ذریعہGetty Images
سری لنکا کے شہر گال میں پاکستان اور سری لنکا کے درمیان پہلا ٹیسٹ میچ دلچسپ مرحلے میں داخل ہو گیا ہے۔
پاکستان کے کپتان اور اوپننگ بلے باز بابر اعظم کی شاندار سنچری نے پاکستان کی پوزیشن کو کسی حد تک بہتر کیا ہے۔ بابر اعظم نے 119 رن بنائے جس میں 2 چھکے اور 11 چوکے شامل تھے۔
اپنی پہلی اننگز میں پاکستان کی ٹیم سری لنکا کے 222 رنز کے جواب میں 218 رن بنا سکی۔ ایک مرحلے پر پاکستان کی بیٹنگ سخت مشکلات کا شکار نظر آئی جب صرف 85 رنز پر سات وکٹ گر چکی تھیں۔ پاکستان کی طرف سے عبد اللّٰہ شفیق اور امام الحق نے اننگز کا آغاز کیا لیکن ابتدا ہی میں پاکستان کی بیٹنگ مشکلات میں گھر گئی کیونکہ دونوں کھلاڑی بالترتیب 13 اور دو رنز بنا کر پویلین روانہ ہو گئے۔ اس کے بعد اظہر علی بھی صرف تین رن ہی بنا سکے۔
آج دوسرے روز کے کھیل کے اختتام پر سری لنکا نے ایک وکٹ کے نقصان پر 36 رن بنائے تھے۔ آؤٹ ہونے والے بلے باز دیموتھ کروناراتھنے کو محمد نواز نے ایل بی ڈبلیو کیا۔ انھوں نے 16 رن بنائے تھے۔ اوشادا فرنانڈو 17 اور کاسن راجیتھا 3 رنز پر کھیل رہے ہیں۔
یہ بھی پڑھیے
End of سب سے زیادہ پڑھی جانے والی
سری لنکا کی جانب سے پربتھ جے سوریا نے پانچ، مہیش ٹھیکشانا اور رمیش مینڈس دو دو جبکہ کاسن راجیتھا نے ایک وکٹ حاصل کی۔ دوسرے روز کے کھیل میں فیلڈ گیلی ہو جانے کے سبب تاخیر ہوئی۔
،تصویر کا ذریعہGetty Images
پہلے روز میچ کے آغاز میں سری لنکا نے ٹاس جیت کر بیٹنگ کا فیصلہ کیا۔ سری لنکا کی بیٹنگ بھی مشکلات کا شکار رہی اور 222 رنز پر پوری ٹیم آؤٹ ہو گئی۔ شاہین شاہ آفریدی نے چار، یاسر شاہ اور حسن علی نے دو دو جبکہ نسیم شاہ اور محمد نواز نے ایک ایک وکٹ حاصل کی۔ سری لنکا کی جانب سے سب سے زیادہ سکور دنیش چندیمال نے کیا۔ انھوں نے 10 چوکوں اور ایک چھکے کی مدد سے 76 رنز بنائے۔
