ٹی ٹوئنٹی ورلڈ کپ: میتھیو ہیڈن اور ورنن فلینڈر پاکستانی ٹیم کے کوچ مقرر
،تصویر کا ذریعہGetty Images
پاکستان کرکٹ بورڈ نے آسٹریلیا کے سابق اوپننگ بیٹسمین میتھیو ہیڈن اور جنوبی افریقہ کے سابق فاسٹ بولر ورنن فلینڈر کو ٹی ٹوئنٹی ورلڈ کپ کے لیے پاکستانی کرکٹ ٹیم کی کوچنگ کی ذمہ داری سونپ دی ہے۔
ان دونوں کو یہ ذمہ داری سونپے جانے کا باضابطہ اعلان پاکستان کرکٹ بورڈ کے نو منتخب چیئرمین رمیز راجہ نے پیر کے روز لاہور میں ہونے والی پریس کانفرنس میں کیا۔ چیئرمین منتخب ہونے کے بعد رمیز راجہ کی یہ پہلی پریس کانفرنس تھی۔
رمیز راجہ نے یہ بھی کہا کہ ان دونوں کے علاوہ پاکستانی ٹیم کے لیے نئے ہیڈ کوچ کی تقرری بھی جلد کی جائے گی۔
یاد رہے کہ ٹی ٹوئنٹی ورلڈ کپ آئندہ ماہ اومان اور متحدہ عرب امارات میں شروع ہونے والا ہے۔ پاکستانی کرکٹ ٹیم اپنا پہلا میچ 24 اکتوبر کو انڈیا کے خلاف دبئی میں کھیلے گی۔
میتھیو ہیڈن اور ورن فلینڈر کی تقرری مصباح الحق اور وقاریونس کی جگہ کی گئی ہے۔ ان دونوں نے پاکستانی کرکٹ ٹیم کے دورہ ویسٹ انڈیز کے اختتام پر چھ ستمبر کو اپنے عہدوں سے استعفی دے دیا تھا۔
پاکستان کرکٹ بورڈ نے ان دونوں کے مستعفی ہو جانے کے بعد نیوزی لینڈ کے خلاف ہوم سیریز کے لیے ثقلین مشتاق اور عبد الرزاق کو وقتی طور پر کوچنگ کی ذمہ داری دی تھی۔
،تصویر کا ذریعہPCB
رمیز راجہ غیرملکی کوچ کے حامی
میتھیو ہیڈن اور ورنن فلینڈرکو پاکستانی ٹیم کی کوچنگ کی ذمہ داری سونپا جانا اس لیے حیران کن نہیں کیونکہ رمیز راجہ ہمیشہ سے غیر ملکی کوچز کے حامی رہے ہیں۔
End of سب سے زیادہ پڑھی جانے والی
رمیز راجہ جب پاکستان کرکٹ بورڈ کے چیف ایگزیکٹیو آفیسر تھے تو اس وقت بھی وہ جاوید میانداد کی جگہ پاکستانی ٹیم کے ہیڈکوچ کے طور پر باب وولمر کو لائے تھے۔
یہ بات طے ہے کہ ٹی ٹوئنٹی ورلڈ کپ کے بعد کسی غیرملکی کوچ کو ہی پاکستانی کرکٹ ٹیم کا مستقل ہیڈ کوچ مقرر کیا جائے گا۔
یہ بھی پڑھیے
،تصویر کا ذریعہGetty Images
میتھیو ہیڈن اور ورنن فلینڈر کون ہیں؟
49 برس کے میتھیو ہیڈن نے بائیں ہاتھ کے بیٹسمین کی حیثیت سے 103 ٹیسٹ میچز میں آسٹریلیا کی نمائندگی کرتے ہوئے 30 سنچریوں اور 29 نصف سنچریوں کی مدد سے 8625 رنز بنائے۔ وہ سب سے زیادہ رنز بنانے والے آسٹریلوی بلے بازوں میں پانچویں نمبر پر ہیں۔
ہیڈن نے 161 ون ڈے انٹرنیشنل میچوں میں 6133 رنز بنائے ہیں جن میں 10 سنچریاں اور 36 نصف سنچریاں شامل ہیں۔
نو ٹی ٹوئنٹی انٹرنیشنل میچوں میں ان کے بنائے گئے رنز کی تعداد 308 ہے جس میں چار نصف سنچریاں شامل ہیں۔
میتھیو ہیڈن ٹیسٹ کرکٹ میں اپنی 380 رنز کی اننگز کی وجہ سے پہچانے جاتے ہیں جس نے انھیں مختصر عرصے کے لیے ٹیسٹ کرکٹ میں سب سے بڑی اننگز کھیلنے والا بیٹسمین بنا دیا تھا۔
انھوں نے یہ اننگز اکتوبر 2003 میں زمبابوے کے خلاف کھیلی تھی اور برائن لارا کے 375 رنز کا ریکارڈ توڑ دیا تھا لیکن برائن لارا نے میتھیو ہیڈن کا ریکارڈ صرف چھ ماہ بعد ہی 400 رنز بنا کر توڑ دیا تھا۔
،تصویر کا ذریعہGetty Images
36 سال کے ورنن فلینڈر جنوبی افریقی آل راؤنڈر ہیں جنھوں نے 61 ٹیسٹ میچوں میں آٹھ نصف سنچریوں کی مدد سے 1779 رنز بنانے کے علاوہ 224 وکٹیں بھی حاصل کی ہیں۔ وہ ٹیسٹ کرکٹ میں پچاس وکٹیں مکمل کرنے والے دوسرے تیز ترین بولر تھے۔
انھوں نے آسٹریلیا کے خلاف اپنے پہلے ٹیسٹ میں آٹھ وکٹیں حاصل کی تھیں۔دوسری اننگز میں ان کی پانچ وکٹوں کی خطرناک بولنگ کے نتیجے میں آسٹریلوی ٹیم صرف 47 رنز بنا کر آؤٹ ہو گئی تھی۔
انھوں نے اپنا آخری ٹیسٹ گذشتہ سال ہی انگلینڈ کے خلاف کھیلا ہے۔
میتھیو ہیڈن دو سال قبل مختصر وقت کے لیے آسٹریلوی ٹیم کے بیٹنگ کنسلٹنٹ رہے تھے لیکن جہاں تک کوچنگ کا تعلق ہے تو میتھیو ہیڈن اور ورنن فلینڈر کو اس کا کوئی تجربہ نہیں۔
