پاکستان بمقابلہ نیوزی لینڈ: چوتھا دن ولیمسن کے نام، کیویز کی برتری 198 رنز
،تصویر کا ذریعہGetty Images
نیوزی لینڈ کے کپتان کین ولیمسن اور ان کے ساتھی ہینری نکولز کے درمیان اب تک 212 رنز کی ناقابل شکست شراکت کے ساتھ کیویز نے میچ پر اپنی گرفت مضبوط کر لی ہے اور اب انھیں پاکستان پر 198 رنز کی سبقت حاصل ہو گئی ہے۔
ایک موقعے پر کیویز کی چار وکٹیں 60 رنز پر گر گئی تھیں لیکن چوتھے دن کے اختتام تک نیوزی لینڈ نے چار وکٹوں پر 272 رنز بنا لیے ہیں اور اب دباؤ پاکستان پر آگیا ہے۔
ولیمسن نے ٹیسٹ میچوں میں اپنی 19ویں سنچری مکمل کر لی ہے اور دوسری جانب نکولز بھی 90 کے سکور پر موجود ہیں۔
پاکستان نے ان دونوں کو آؤٹ کرنے کے متعدد مواقعے ضائع کیے جب پہلے نکولز کے ایک ایل بی ڈبلیو پر پاکستان نے ریویو نہیں لیا جبکہ دوسری جانب یاسر شاہ نے دو مواقعوں پر ولیمسن کے کیچ گرا دیے جب ایک بار وہ 80 پر اور ایک بار وہ 106 رنز پر کھیل رہے تھے۔
چائے کے وقفے تک نیوزی لینڈ کا سکور 199 رنز تھا اور او موقع پر ایسا لگ رہا تھا کہ آخری سیشن میں کیوی بلے باز تیز کھیل پیش کریں گے لیکن وہ 35 اوورز میں 73 رنز ہی بنا سکے۔
،تصویر کا ذریعہGetty Images
آج صبح جب کھیل کا آغاز ہوا تو میچ کے چوتھے روز نیوزی لینڈ نے اپنی دوسری اننگز کا 26 رنز دو کھلاڑی آؤٹ سے دوبارہ آغاز کیا۔
دن کے چھٹے اوور میں نائٹ واچ مین سومرول چار رنز بنا کر یاسر شاہ کی 200ویں ٹیسٹ وکٹ بن گئے جب لیگ سپنر نے ان کو ایل بی ڈبلیو کر دیا۔ اس وکٹ کے ساتھ یاسر دنیائے کرکٹ کی تاریخ میں ٹیسٹ کرکٹ میں 200 وکٹ لینے والے تیز ترین بولر بن گئے۔
End of سب سے زیادہ پڑھی جانے والی
ان کے بعد آنے والے راس ٹیلر نے جارحانہ انداز اختیار کیا لیکن وہ 14 گیندوں پر 22 رنز بنا کر شاہین شاہ آفریدی کی دوسری وکٹ بن گئے۔
اس وقت کیویز کے 60 رنز تھے اور لگ رہا تھا کہ شاید پاکستان میچ پر آہستہ آہستہ اپنی گرفت مضبوط تر کر لے گا لیکن اس کے بعد کپتان ولیمسن اور نکولز نے انتہائی عمدہ بیٹنگ کی اور پاکستان کے تمام تر حربوں کو ناکام بنا دیا۔
اس سے قبل تیسرے روز کے اختتام تک پاکستان نے اپنی پہلی اننگز میں نیوزی لینڈ پر 74 رنز کی سبقت حاصل کر لی تھی۔
،تصویر کا ذریعہAFP
دوسری اننگز میں پاکستان کو پہلی کامیابی اننگز کے چوتھے اوور میں ملی جب شاہین شاہ آفریدی نے جیت راول کو ایل بی ڈبلیو کر لیا۔ جلد ہی یاسر شاہ نے ٹام لیتھم کی وکٹ حاصل کر لی جن کا حارث سہیل نے زبردست کیچ لیا۔ انھوں نے 10 رنز بنائے تھے۔
اس سے قبل پاکستان کی پوری ٹیم 348 رنز پر آؤٹ ہوئی جس میں خاص بات اظہر علی اور اسد شفیق کی ڈبل سنچری کی شراکت تھی۔ ان دونوں نے اپنی اپنی انفرادی سنچری بھی مکمل کی لیکن دوسری جانب کیوی سپنر نے زبردست کارکردگی دکھاتے ہوئے کم بیک کیا اور پاکستان کی آخری سات وکٹیں صرف 62 رنز کے عوض حاصل کر لیں۔
ٹیسٹ سیریز سے قبل دونوں ٹیموں کے درمیان تین ٹی 20 اور تین ہی ایک روزہ میچوں کی سیریز بھی کھیلی گئی تھی جس میں پاکستان نے نیوزی لینڈ کو ٹی 20 میچوں کی سیریز میں تین صفر سے شکست دی جبکہ ون ڈے سیریز ایک، ایک میچ سے برابر رہی تھی۔
خیال رہے کہ تین ٹیسٹ میچوں کی سیریز 1-1 سے برابر ہے۔
ابوظہبی میں ہی کھیلے گئے پہلے ٹیسٹ میچ میں نیوزی لینڈ نے پاکستان کو چار رنز سے شکست دی تھی جبکہ دبئی میں کھیلے گئے دوسرے ٹیسٹ میچ میں پاکستان نے ایک اننگز اور 16 رنز سے زیر کر کے سیریز برابر کر دی تھی۔
’ٹیسٹ کرکٹ میں تیز ترین 200 وکٹیں‘
،تصویر کا ذریعہGetty Images
پاکستان لیگ سپنر یاسر شاہ نے نیوزی لینڈ کی دوسری اننگز کے دوران ٹیسٹ کرکٹ میں 82 سال سے قائم ریکارڈ توڑ دیا جب انھوں نے نائٹ واچ مین ولیم سومرویل کی وکٹ حاصل کر لی۔
اس وکٹ کے ساتھ یاسر شاہ نے اپنے 33ویں ٹیسٹ میچ میں 200 شکار حاصل کر لیے۔ یاسر سے پہلے یہ ریکارڈ آسٹریلیا کے سپنر کلیری گریمٹ کے پاس تھا جنھوں نے 36 میچوں میں 200 وکٹیں حاصل کی تھیں۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام, 1
یاسر شاہ کے اعزاز پر ٹوئٹر پر بھی صارفین کا تبصرہ چلتا رہا اور وہ انھیں مبارکباد کی پیغامات دیتے رہے۔
کرکٹ کے اعداد و شمار جمع کرنے والے مظہر ارشد نے یاسر کے ریکارڈ پر تبصرہ کیا کہ تین ٹیسٹ کے فرق سے ریکارڈ بنانا ایسا ہی ہے جیسے یوسین بولٹ 200 میٹر کی ریس کا عالمی ریکارڈ دو سیکنڈ کے واضح فرق سے توڑ دیں۔
یاسر شاہ نے اس سے پہلے نو ٹیسٹ میچوں میں 50 وکٹیں اور 17 میچوں میں 100 وکٹیں بھی حاصل کی۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام, 2
