جیمز اینڈرسن 500 وکٹیں لینے والے پہلے برطانوی بولر بن گئے

فاسٹ بولر جیمز اینڈرسن لارڈز میں ویسٹ انڈیز کے خلاف کھیلے جانے والے ٹیسٹ میچ کے دوسرے دن مجموعی طور پر 500 ٹیسٹ وکٹیں لینے والے پہلے برطانوی بولر بن گئے ہیں۔

35 سالہ سوئنگ بولر نے یہ کارنامہ چائے کے وقفے کے تھوڑی دیر بعد ویسٹ انڈین بلے باز کریگ بریتھویٹ کو بولڈ کر کے حاصل کیا۔

اینڈرسن دنیا کے چھٹے بولر اور تیسرے فاسٹ بولر ہیں جنھوں نے یہ اعزاز حاصل کیا ہے۔ اس وقت کھیلنے والے بولروں میں وہ وکٹوں کے لحاظ سے سرِ فہرست ہیں۔

سری لنکا کے سپنر مرلی دھرن 800 وکٹیں لے کر پہلے نمبر پر ہیں۔ ان کے بعد آسٹریلیا کے لیگ سپنر شین وارن ہیں جنھوں نے 708 وکٹیں حاصل کی ہیں،جب کہ ایک اور لیگ سپنر انڈیا کے انیل کمبلے نے کل 619 وکٹیں بٹوری ہیں۔

فاسٹ بولروں میں پہلے نمبر پر آسٹریلیا کے میک گرا ہیں جنھوں نے 563 وکٹیں لے رکھی ہیں، جب کہ ویسٹ انڈیز کے کورٹنی والش کے حصے میں 519 وکٹیں آئی ہیں۔

اینڈرسن نے اپنے کریئر کا آغاز 2003 میں کیا تھا اور اب تک انھوں نے 129 میچ کھیل کر کل 501 وکٹیں حاصل کی ہیں۔ اس دوران انھوں نے 23 بار ایک اننگز میں پانچ یا زائد وکٹیں، جب کہ تین بار میچ میں دس یا زائد وکٹیں حاصل کی ہیں۔ ان کی بہترین بولنگ 43 رنز کے عوض سات وکٹیں ہے۔

اینڈرسن خاصے فٹ ہیں اور توقع کی جا رہی ہے کہ اگر ان کی فارم برقرار رہی تو وہ میک گرا کو پیچھے چھوڑ کر ٹیسٹ کرکٹ کی تاریخ میں سب سے زیادہ وکٹیں لینے والے بولر بن سکتے ہیں۔

وہ خود ایک انٹرویو میں کہہ چکے ہیں کہ 'ایسی کوئی وجہ نہیں ہے کہ میں 40 برس تک نہ کھیل سکوں۔ میں خوش قسمت ہوں کہ میرے جسم پر اتنا بوجھ نہیں پڑتا جتنا دوسرے فاسٹ بولروں کے جسم پر پڑتا ہے۔'

تاہم جیمز اینڈرسن اوسط کے اعتبار سے 500 کلب میں شامل دوسرے فاسٹ بولروں سے پیچھے ہیں۔ میک گرا کی اوسط 21.62، والش کی 24.44 ہے، جب کہ اینڈرسن کی اوسط 27.61 رنز فی وکٹ ہے۔