آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
ہیملٹن ٹیسٹ میں نیوزی لینڈ کے بولرز حاوی
- مصنف, عبدالرشید شکور
- عہدہ, بی بی سی اردو ڈاٹ کام، کراچی
پاکستانی کرکٹ ٹیم اپنے بیٹسمینوں کی ایک بار پھر مایوس کن کارکردگی کے سبب ہیملٹن ٹیسٹ میں شدید مشکلات سے دوچار ہوگئی ہے۔
دوسرے ٹیسٹ کے دوسرے دن کھیل کے اختتام پر پاکستان نے اپنی پہلی اننگز میں 76 رنز بنائے تھے اور اس کے 5 کھلاڑی آؤٹ ہوچکے تھے۔
اس سے قبل نیوزی لینڈ کی ٹیم اپنی پہلی اننگز میں 271 رنز بناکر آؤٹ ہوگئی تھی۔
پاکستانی ٹیم نیوزی لینڈ کے سکور سے 195 رنز پیچھے ہے اور اس کی پانچ وکٹیں باقی ہیں۔
پاکستان کے دونوں اوپنرز آغاز میں ہی ٹم ساؤدی کا شکار بن گئے اور ڈبل فگرز کے سکور میں آنے سے پہلے ہی پویلین لوٹ گئے۔
ٹم ساؤدی نے پہلے سمیع اسلم کو پانچ رنز پر راول کے ہاتھوں کیچ کرایا اور پھر صرف ایک رن بنانے والے اظہرعلی کو وکٹ کیپر واٹلنگ کی مدد سے پویلین کی راہ دکھائی۔
یونس خان بھی ساؤدی کی گیند پر وکٹ کے پیچھے صرف دو رنز بناکر آؤٹ ہوئے۔یہ سیریز ان کے لیے اب تک مایوس کن رہی ہے اور وہ اب تک تینوں اننگز میں ڈبل فگرز میں بھی نہیں آسکے ہیں۔
End of سب سے زیادہ پڑھی جانے والی
ٹم ساؤدی کے بعد ویگنر نے لگاتار گیندوں پر اسد شفیق اور محمد رضوان کی وکٹیں حاصل کیں۔
اسد شفیق کو انھوں نے 23 کے سکور پر بولڈ کیا اور اپنا پہلا ٹیسٹ کھیلنے والے محمد رضوان کو پہلی ہی گیند پر ہینری کے ہاتھوں کیچ کرا دیا۔
پاکستان کی پانچ وکٹیں 51 رنز پر گریں جس کے بعد بابراعظم اور سرفراز احمد آٹھ اوورز گزار گئے اور سکور کو 76 تک لے گئے۔
بابراعظم 34 اور سرفراز نو رنز پر ناٹ آؤٹ ہیں۔
اس سے پہلے نیوزی لینڈ کی ٹیم نے اپنے گذشتہ روز کے سکور میں 194 رنز کا اضافہ کیا۔
جیت راول نے سیریز میں دوسری نصف سنچری سکور کی لیکن میزبان ٹیم ایک مرحلے پر119 رنز پر پانچ وکٹوں سے محروم ہوچکی تھی لیکن پھر کالن ڈی گرینڈ ہوم کے 37، وکٹ کیپر واٹلنگ کے 49 ناٹ آؤٹ اور ٹم ساؤدی کے 29 رنز ان کی ٹیم کے بہت کام آگئے۔
پاکستانی بولرز میں سہیل خان چار وکٹوں کے ساتھ قابل ذکر رہے جبکہ ایک سال بعد ٹیم میں واپس آنے والے عمران خان نے تین وکٹیں حاصل کیں۔
پاکستانی بولرز کو اپنے وکٹ کیپر سرفراز احمد سے مکمل مدد ملتی رہی جنھوں نے اننگزمیں چار کیچز لیے۔
