کمبوڈیا: دنیا کی سب سے بڑی تازہ پانی کی مچھلی دریائے میکونگ سے پکڑی گئی

سائنسدانوں کا کہنا ہے کہ تازہ پانی میں پائی جانے والی دنیا کی سب سے بڑی مچھلی کمبوڈیا کے دریائے میکونگ میں پائی گئی ہے۔ سائنسدانوں کے مطابق کمبوڈیا کے دریائے میکونگ سے پکڑی جانے والی سٹنگرے مچھلی کا وزن تین سو کلو گرام ہے۔

اس سے قبل سنہ 2005 میں تھائی لینڈ کے دریا سے 293 کلو گرام وزن والی کیٹ فش پکڑی گئی تھی۔ مگر اس بار پکڑی گئی مچھلی نے اس کا ریکارڈ توڑ دیا ہے۔

تاہم باضابطہ طور پر تازہ پانی میں پائی جانے والی دنیا کی سب سے بڑی مچھلی کے متعلق کوئی سرکاری ریکارڈ یا ڈیٹا دستیاب نہیں ہے۔

دریائے میکونگ آبی حیات کے تنوع سے مالا مال ہے لیکن یہاں حد سے زیادہ مچھلی کے شکار، ڈیموں کی تعمیر اور آبی آلودگی نے اس کے ایکو سسٹم یعنی قدرتی نظام کو کافی متاثر کر رکھا ہے۔

دریائے میکونگ تبت کے سطح مرتفع سے چین، میانمار، تھائی لینڈ، لاؤس، کمبوڈیا اور ویت نام سے ہوتا ہوا بہتا ہے۔

امریکی امدادی ادارے یو ایس ایڈ کے تحت دریائے میکونگ میں آبی حیات کے تحفظ کے لیے کام کرنے والے بائیولوجسٹ زیب ہوگان کا کہنا ہے کہ ’دنیا کے چھ براعظموں کے دریاؤں اور جھیلوں میں بڑی مچھلیوں پر تحقیق کے 20 برسوں کے دوران پکڑی جانے والی یہ مچھلی ،تازہ پانی میں پائی جانے والی سب سے بڑی مچھلی ہے۔ اس سے پہلے اتنی وزنی مچھلی دنیا میں کہیں نہیں پکڑی گئی اور نہ ہی اس کو کسی ریکارڈ میں درج کیا گیا۔‘

ڈاکٹر ہوگن جو یونیورسٹی آف نیواڈا میں پروفیسر بھی ہیں کا مزید کہنا تھا کہ ’اس مچھلی کو تلاش کرنا اور اس کو ریکارڈ میں درج کرنا قابل ذکر ہے، اور امید کی ایک نادر کرن بھی ہے، کیونکہ یہ دریائے میکونگ سے ملی ہے، ایک ایسا دریا جسے اس وقت بہت سے چیلنجز کا سامنا ہے۔‘

امریکی ادارے یو ایڈ کے تحت بڑی مچھلیوں کے تحفظ کا یہ منصوبہ کمبوڈین فشریز ایڈمنسٹریشن کے ساتھ مل کر کام کر رہا ہے جس میں ماہی گیروں کا ایک نیٹ ورک قائم کیا گیا ہے جو بڑی یا خطرے سے دوچار مچھلیاں پکڑتے وقت محققین کو اس متعلق آگاہ کرتے ہیں۔

یہ بھی پڑھیے

کروکر: ہزاروں میں بکنے والی مچھلی کی قیمت لاکھوں تک کیسے پہنچی؟

ماہی گیروں کو لکھ پتی بنانے والی کروکر مچھلی میں خاص کیا ہے؟

کیا ہلسا مچھلی معدوم ہو رہی ہے؟

ڈائنوسارز کے دور کی مچھلی جو ایک سو سال زندہ رہ سکتی ہے

تیرہ جون کی رات کو کوہ پریح جزیرے پر ایک مقامی مچھیرے نے محققین کو کال کر کے بتایا کہ اس نے 'بہت بڑی' سٹنگرے مچھلی پکڑی ہے۔ جس کی لمبائی 3.98 میٹر اور موٹائی 2.2 میٹر ہے۔

محققین نے اس مچھلی کی مستقبل کی نقل و حرکت کو ٹریک کرنے کے لیے اسے ایک صوتی ٹیگ لگانے کے بعد واپس دریا میں چھوڑ دیا۔

ڈاکٹر ہوگن کا کہنا ہے کہ شام کے وقت جب چاند آسمان پر نمودار ہوا تو وہ مچھلی دریائے میکونگ کے گدلے پانی میں کہیں غائب ہو گئی۔ کمبوڈیا کے اس جزیرے کی مقامی زبان کھیمر میں اس مچھلی کو 'بورامے' کا نام دیا گیا جس کا مطلب پورا چاند ہوتا ہے۔

ڈاکٹر ہوگن کا کہنا ہے کہ 'سٹنگرے کی تلاش اس بات کا ثبوت ہے کہ قدرتی دنیا اب بھی نئی اور غیر معمولی دریافتیں کر سکتی ہے، اور افسوس کہ بہت سے بڑی آبی مخلوقات پر اچھی طرح تحقیق نہیں کی جاتی۔'

تازہ پانی میں پائی جانے والی یہ بڑی سٹنگرے مچھلی کا شمار معدومیت کے خطرے سے دوچار آبی حیات میں ہوتا ہے۔ مئی سے لے کر اب تک یہ دوسری سٹنگرے مچھلی ہے جس کا اس ٹیم نے مشاہدہ کیا ہے۔ اس سے قبل پکڑی جانے والی مچھلی کا وزن 181 کلو گرام تھا۔

ڈاکٹر ہوگن کہتے ہیں کہ'جب ریکارڈ مچھلیاں پائی جاتی ہیں، تو اس کا مطلب ہے کہ آبی ماحول اب بھی نسبتاً صحت مند ہے۔ یہ اس کے برعکس ہے جو ہم نے دریائے یانٹگز جیسے مقامات پر دیکھا ہے، جہاں سائنسدانوں نے چینی پیڈل فش کے معدوم ہونے کی اطلاع دی تھی۔'

وہ کہتے ہیں کہ 'دریائے میکونگ کے گہرے تالابوں میں ان بڑی مچھلیوں کے علاوہ بھی بہت کچھ پوشیدہ ہے اور آبی حیات کی اس اہم آماجگاہ میں ہر سال اربوں مچھلیاں پیدا ہوتی ہیں جو کمبوڈیا اور ویتنام کے لاکھوں افراد کے لیے غذائی تحفظ اور روزگار کو یقینی بناتی ہیں۔'