کینیڈا امیگریشن کے بعد نیوزی لینڈ امیگریشن سائٹ پر ٹریفک میں 2500 فیصد اضافہ

امریکہ میں ڈونلڈ ٹرمپ کے منتخب ہونے کے بعد سے نیوزی لینڈ کے حکام کا کہنا ہے کہ نیوزی لینڈ امیگریشن ویب سائٹ پر ٹریفک میں بے انتہا اضافہ ہوا ہے۔

امیگریشن نیوزی لینڈ کا کہنا ہے کہ گذشتہ 24 گھنٹوں میں 56 ہزار سے زائد لوگ آئے جو کہ معمول کے مقابلے میں 2500 فیصد زیادہ ہیں۔ حکام کا کہنا ہے کہ عام دنوں میں ان کی ویب سائٹ پہر 2300 لوگ آتے ہیں۔

نیوزی لینڈ کی ایک اور ویب سائٹ 'نیوزی لینڈ ناؤ' پر بھی ٹریفک میں غیر معمولی اضافہ ہوا۔ اس ویب سائٹ پر نیوزی لینڈ میں رہنے، پڑھنے اور ملک میں سرمایہ کاری کرنے کے حوالے سے معلومات ہیں۔

حکام کے مطابق گذشتہ 24 گھنٹوں میں 'نیوزی لینڈ ناؤ' کی ویب سائٹ پر امریکہ سے 70 ہزار پانچ سو افراد آئے جبکہ عام دنوں میں یہ ٹریفک تقریباً 1500 کے لگ بھگ ہوتی ہے۔

یاد رہے کہ صدارتی انتخاب کے نتائج کے وقت کینیڈا کی امیگریشن کی ویب سائٹ پر اتنی ٹریفک بڑھی کہ ویب سائٹ ہی بیٹھ گئی۔

کینیڈا کی سٹیزن شپ اینڈ امیگریشن سروس (سی آئی سی) کے حکام سے فوری طور پر اس پر موقف حاصل نہیں کیا جاسکا۔

تاہم کچھ ماہرین کا کہنا ہے اس کی وجوہات کچھ اور ہوسکتی ہیں۔

یونیورسٹی آف سرے کے پروفیسر ایلن ووڈ کہتے ہیں: 'یہ محض ایک غیرمعمولی اتفاق ہوسکتا ہے۔'

تاہم اس سے قطع نظر سوشل میڈیا پر اس حوالے سے بہت زیادہ بیان بازی کی جارہی ہے۔