وسعت اللہ خان بی بی سی اردو ڈاٹ کام، پاکستان

	بورس یلسن نے گورباچوف پالیسیوں کے دلدادہ عوام کو جرنیلوں کے بالمقابل کھڑا کردیا

مثلاً آخری سوویت رہنما میخائیل گورباچوف کو جب اگست انیس سو اکیانوے میں ریڈ آرمی کے چند طالع آزما جنرلوں نے کریمیا میں نظربند کردیا تو یہ بورس یلسن ہی تھے جنہوں نے ماسکو میں پرسترائیکا (تعمیرِ نو) اور گلاسنوسٹ ( کھلے پن) کی گورباچوف پالیسیوں کے دلدادہ عوام کو جرنیلوں کے بالمقابل کھڑا کردیا اور صرف تین روز میں فوجی بغاوت جھاگ کی طرح بیٹھ گئی لیکن یہی بورس یلسن تھے جنہوں نے صدر بننے کے بعد نئی نئی روسی پارلیمان کے اختلاف رائے کا علاج پارلیمنٹ کی عمارت پر ٹینکوں کے گولے برسا کر ڈھونڈنے کی کوشش کی۔

بورس یلسن نے نو آزاد روس میں پھیلے ہوئے انتشار کا کوئی پائیدار علاج ڈھونڈنے کے بجائے اپنے حاشیہ بردار سابق کیمونسٹوں اور دوستوں کو نہ صرف کلیدی عہدے بانٹے بلکہ سوویت دور کے بڑے بڑے صنعتی شعبے بخشش میں عطا کردیے۔ اس کے نتیجے میں روسی معیشت ایک طاقتور موقع پرست مافیا کے چنگل میں پھنس گئی۔ اس ظالمانہ، ناتجربہ کار نج کاری کے نتیجے میں جو نودولتیا کلچر پیدا ہوا اس نے پالنے سے قبر تک ہر ضرورت کے لیے ریاست کی جانب دیکھنے کے عادی عام روسی کو فٹ پاتھ پر کھڑا کردیا۔

یہ بات مغرب کے بھی مفاد میں تھی کہ ایک بڑی سلطنت کا ملبہ بکھرنے کے نتیجے میں روس مسائل کے جس گرداب میں پھنس گیا ہے اگلے کئی برس تک وہ اسی میں پھنسا رہے۔

چیچنیا پر فوج کشی  بورس یلسن کی سب سے بڑی غلطی جس نے انہیں بالآخر زوال اور گمنامی میں دھکیل دیا چیچنیا پر بلا سوچے سمجھے فوج کشی تھی

پھر یلسن کی میڈیا میں اس طرح کی تصاویر آنے لگیں کہ ایک کانفرنس کے دوران انہوں نے قریب سے گذرتی ہوئی ایک خاتون سے نازیبا حرکت کردی یا کسی تقریب میں بولتے بولتے سو گئے۔ دل کے عارضے میں مبتلا ہونے کے سبب بار بار ہسپتال جانے لگے۔ ان حالات میں انکے قریبی ساتھیوں کے پاس یہ مشورہ دینے کے علاوہ کوئی چارہ نہ تھا کہ بورس یلسن کو سیاست سے کنارہ کش ہو کر آرام کرنا چاہیے۔ اقتدار سے سبکدوشی کے بعد میڈیا میں بورس یلسن کا تذکرہ بھی غائب ہوگیا اور پیر کو دنیا سے ان کی رخصتی کی خبر آگئی۔