حسن مجتبی سان ڈیاگو، کیلیفورنیا

یہ اقتباسات مختار مائی کی کتاب ’ان دی نیم آف آنر‘ سے ہیں جس کے انگریزی اور ہسپانوی ایڈیشن امریکہ میں بدھ کے روز شائع ہوئے ہیں۔

کئی زبانوں میں شائع کی جانے والی مختار مائی کی اس کتاب کے دو ايڈیشن انگریزی اور ہسپانوی زبانوں میں اسی پبلشر سائمن اینڈ شوسٹر نے جاری کیے ہیں جس نے اس سے قبل پاکستان کے فوجی حکمران جنرل پرویز مشرف کی کتاب ’ان دی لائن آف فائر‘ شائع کی تھی۔

کتاب کے دو ايڈیشن انگریزی اور ہسپانوی زبانوں میں اسی پبلشر سائمن اینڈ شوسٹر نے جاری کیے ہیں جس نے اس سے قبل پاکستان کے فوجی حکمران جنرل پرویز مشرف کی کتاب ’ان دی لائن آف فائر‘ شائع کی تھی

اصل فرانسیسی زبان میں ایک صحافی کے طرف سے مختار مائی کی آپ بیتی پر مبنی لکھی ہوئی یہ کتاب انگریزی کے علاوہ ہندی، جرمن، اور عبرانی سمیت کئی زبانوں میں ترجمہ ہوئی ہے اور ان میں چھپ چکی ہے- مختار مائی کی اس کتاب کا پیش لفظ ’نیویارک ٹائمز‘ کے مشہور کالم نگار نکولس ڈی کرسٹوف نے لکھا ہے۔

کتاب میں اپنی آپ بیتی سمیت مختار مائی نے پہلی بار کتابی صورت میں اپنے آپ پر ہونے والی اجتمائی آبروریزی کی بپتا یوں بیان کی ہے:

’میں وہاں تھی، یہ سچ تھا، لیکن وہ میں وہاں نہیں بھی رہی تھی: یہ میرا خوفزدہ جسم اور کانپتی ٹانگيں میری نہیں رہی تھیں- میں بیہوش ہوکر فرش پر گرنے والی تھی مگر مجھے اس کا موقع ہی نہیں ملا۔وہ مجھے ایسے گھسیٹ کر لے گۓ جیسے کسی بکری کو ذبح ہونے کے لیے قصائی کی طرف لایا جاتا ہے۔ مردوں کے بازئوں نے میرے بازئوں سے مجھے پکڑا ، وہ مجھے میرے کپڑوں، شال اور بالوں سے کھینچنے لگے۔

’قرآن کے صدقے مجھے جانے دو، خدا کے نام پر مجھے جانے دو‘ میں چیخی اور چلائي۔

’ميں ایک رات سے دوسری کی طرف چلی گئی، باہر کے اندھیرے سے اندر کے اندھیرے کی طرف لائي گئی جو ایک بند جگہ تھی جہاں میں ان پانچ آدمیوں کو چاند کی روشنی سے دیکھ سکتی تھی جو ایک چھوٹی سے کھڑکی سے چھن کر اندر آرہی تھی۔ چار دیواری اور دروازے پر مسلح گماشتے پھیرہ دے رہے تھے۔
فرار ناممکن تھا۔ کوئی دعا نا ممکن تھی۔‘