طالبان کے ترجمان کا کہنا ہے کہ جھڑپوں میں ان کا صرف ایک فرد ہلاک ہوا ہے

جنرل رحمت اللہ رؤفی جنوبی افغانستان میں فوجی کمانڈر ہیں۔ انہوں نے یہ بات پیر کے روز جنوبی افغانستان کے شہر قندھار میں ایک اخباری کانفرنس میں کہی۔ ان کا دعوی تھا کہ ان جھڑپوں میں طالبان کے سربراہ ملا عمر کے ایک عزیز اما اللہ بھی مارے گئے ہیں۔ ملا عمر آجکل مفرور ہیں۔

تاہم افغان وزیر دفاع کے ترجمان جنرل عاظمی کا کہنا تھا کہ ملا عمر کے عزیر ہلاک ہونے والوں میں نہیں بلکہ گرفتار ہونے والوں میں شامل ہیں۔

جنرل رحمت اللہ رؤفی کے مطابق اتوار کی رات صوبہ ہلمند میں ایک جھڑپ میں دس طالبان ہلاک ہوئے تھے اور ان دس کے علاوہ ملحقہ صوبے قندھار میں بارہ اور صوبے ارزگان میں پندرہ طالبان ہلاک ہوئے ہیں۔

تاہم افغانستان میں موجود اتحادی فوج نے ان حملوں اور ہلاکتوں کی تصدیق نہیں کی۔

ادھر طالبان کے ترجمان محمد حنیف نے ان جھڑپوں کی تصدیق کی ہے لیکن ان کا کہنا ہے کہ طالبان کا صرف ایک فرد ہلاک ہوا ہے اور وہ ہلمند کی جھڑپ میں۔

جنوبی اور وسطی افغانستان میں گزشتہ چند ماہ سے تشدد میں اضافہ ہوا ہے جس میں کئی افراد ہلاک ہو چکے ہیں۔