جبری شادی کے زیادہ تر معاملات میں خواتین اس ظلم کا شکار بنتی ہیں

اس وقت اولاد کو زبردستی کی شادی پر مجبور کرنے پر والدین کو صرف اس وقت سزا دی جا سکتی ہے جب یا تو اولاد کو اغوا کیا جائے یا اس پر تشدد کیا جائےگا۔

برطانوی وزیر اس معاملے میں تین ماہ تک مشاورت کا سلسلہ جاری رکھیں گے اور اس کے بعد اسے قانونی شکل دینے کا فیصلہ کیا جائے گا۔

جبری شادیوں کے لیے بنائے گئے برطانوی وزارتِ داخلہ و خارجہ کے مشترکہ یونٹ نےگزشتہ چار برس میں زبردستی کی شادیوں کے ایک ہزار معاملات کا پتہ چلایا ہے۔

وزارتِ خارجہ کے ایک ترجمان کا کہنا ہے کہ حکومت جبری شادیوں پر قابو پانے کے لیے کئی سال سے کوشاں ہے۔ ان کا کہنا تھا کہ جبری شادیاں نہ صرف حقوقِ انسانی کے خلاف ہیں بلکہ ان شادیوں کے سلسلے میں لوگوں کو اغواء کر کے بیرونِ ملک بھی لے جایا جاتا ہے۔

برطانوی پولیس حکام نے پہلے ہی حکومت کو مشورہ دیا ہے کہ جبری شادیوں کو جرم قرار دیا جانا چاہیے۔

پولیس حکام کا کہنا ہے کہ جبری شادی کے قانون سے نہ صرف مقدمات میں آسانی پیدا ہو گی بلکہ برطانیہ کی نئی نسل کو یہ بھی پیغام ملے گا کہ اگر وہ شادی نہیں کرنا چاہتے تو انہیں زبردستی اس پر مجبور نہیں کیا جا سکتا۔

بی بی سی کے نمائندے نیل بینیٹ کا کہنا ہے کہ سینکڑو ں بلکہ ہزاروں برطانوی اپنی اپنی کمیونٹی میں اس قسم کا دباؤ برداشت کرتے ہیں۔ ان شادیوں سے انکار کے نتیجے میں نہ صرف غیرت کے نام پر قتل جیسے معاملات سامنے آتے ہیں بلکہ یہ ایشیائی لڑکیوں میں خودکشی کی بڑھتی ہوئی شرح کی وجہ بھی ہے۔

جبری شادی کے زیادہ تر معاملات میں خواتین اس ظلم کا شکار بنتی ہیں تاہم پندرہ فیصد کیسوں میں مردوں کو بھی ان کی رضا کے بغیر شادی پر مجبور کیا جاتا ہے۔

برطانیہ میں ہونے والی زیادہ تر جبری شادیاں پاکستانی، بھارتی اور بنگلہ دیشی گھرانوں میں ہوتی ہیں تاہم اس قسم کے کچھ واقعات شمالی افریقہ، مشرقِ وسطیٰ اور ایشیا کے دیگر علاقوں سے تعلق رکھنے والی کمیونٹیوں میں بھی پیش آتے ہیں۔