عراق میں فوج کی موجودگی کے بارے عوامی حمایت میں کمی واقع ہو رہی ہے

امریکی وزارتِ دفاع پینٹاگن کے مطابق گزشتہ چند سالوں میں افغانستان اور عراق میں جنگ کی وجہ سے امریکی فوجیوں میں طلاق کی شرح میں اضافہ ہوا ہے۔

اعدادوشمار سے ظاہر ہوتا ہے کہ سن دو ہزار چار میں امریکی فوجیوں میں طلاق کی شرح سن دوہزار دو کی بانسبت تین گنا ہو گئی ہے۔

امریکی فوج کی ایک ترجمان نے کہا کہ جنگ کے دوران امریکی فوج کے افسران اور ان کے خاندان زیادہ دباؤ کا شکار ہوتے ہیں۔

جنگ سے پڑنے والے منفی اثرات کی ایک اور علامت فوج میں بھرتی کی گرتی ہوئی تعداد ہے۔ امریکی فوج مسلسل چار سالوں سے فوج میں بھرتی کا ہدف حاصل کرنے میں ناکام رہی ہے۔

فوج میں بھرتی کی گرتی ہوئی تعداد کے باعث پینٹاگن نے مئی میں مقررہ ہدف میں کمی کر دی تھی لیکن یہ ہدف بھی حاصل نہیں کیا جا سکا۔

پینٹاگن کی ایک ترجمان کرنل جو کرٹن نے کہا ہے کہ فوج کو امید ہے کہ وہ اکتوبر دو ہزار چار سے ستمبر دو ہزار پانچ تک کے بارہ مہینوں میں اسی ہزار جوانوں کو بھرتی کرنے کا ہدف حاصل کرلےگی۔

برطانوی خبررساں ادارے رائٹرز کی طرف سے فراہم کیے گئے اعدادو شمار کےمطابق سن دوہزار دو میں افسران میں طلاق کی شرح ایک عشاریہ نو فیصد تھی جب کہ جوانوں میں یہ شرح تین عشاریہ ایک فیصد تھی۔

دوہزار تین میں افسران میں طلاق کی شرح بڑھ کر تین عشاریہ تین فیصہ اور جوانوں میں یہ شرح تھوڑی سی کم ہو کر دو عشاریہ آٹھ فیصد پر آ گئی۔

تاہم دوہزار چار میں اس شرح میں ایک نمایاں اضافہ ہوا اور افسران میں طلاق کی شرح بڑھ کر چھ فیصد اور جوانوں میں تین عشاریہ پانچ فیصد ہو گئی۔