 |  ایریئل شیرون کی حکومت نے گزشتہ جولائی میں مشرقی یروشلم میں یہ متنازعہ قانون لاگو کرنے کا فیصلہ کیا تھا |
اسرائیل اراضی سے متعلق ایک قانون کے لاگو کرنے پر دوبارہ غور کررہا ہے جس کے تحت ہزاروں ایکڑ فلسطینی اراضی اسرائیل کے قبضے میں آسکتی ہے۔ اسرائیل کے ایک مقامی روز نامے کے مطابق امریکہ کو تشویش ہے کہ اسرائیل 1950 کے ایک قانون کو استعمال کرتے ہوئے فلسطینیوں کی زمین پر قبضہ کرسکتا ہے۔ اس قانون پر فی الوقت غور کیا جارہا ہے اور اس کے نتائج امریکی اور اسرائیلی حکام کی ایک ملاقات میں بتائے جائیں گے۔ امریکی وزیر خارجہ کونڈولیزا رائس اور امریکہ میں ایک اسرائیلی وفد کی اس ملاقات کا مقصد اگلے ہفتے کونڈولیزا رائس کے اسرائیل کے دورے کی تیاری ہے۔ ایریئل شیرون کی حکومت نے گزشتہ جولائی میں مشرقی یروشلم میں یہ متنازعہ قانون لاگو کرنے کا فیصلہ کیا تھا۔ بنیادی طور پر یہ قانون اس لیے بنایا گیا تھا تاکہ 1948 میں اپنی زمین چھوڑ کر جانے والے فلسطینیوں کی زمین پر قبضہ کیا جاسکے۔ اسرائیل نےسب سے پہلے بڑی تعداد میں فلسطینیوں کو ان کی زمین سے بے دخل کیا اور پھر فصیل تعمیر کرکے ان کی واپسی کو ناممکن بنا دیا۔ اب جب وہ طویل عرصے تک وہاں نہیں جاسکیں گے تو اسرائیل اس قانون کے نفاذ کے بعد یہ زمین مستقل طور پر اپنے قبضے میں کرلے گا۔ فلسطینیوں کا کہنا ہے کہ اس قانون کے ذریعے اسرائیل ان کی زمین پر ناجائز قبضے کا جواز پیش کرنا چاہتا ہے۔ | 
یہ صفحہ دوست کو ای میل کیجیئے
پرِنٹ کریں
