یہ رپورٹ منظور شدہ قراردادوں کے سلسلے میں اقوامِ متحدہ کے طرزِ عمل میں تبدیلی کی ایک کوشش ہے

اس رپورٹ میں غربت کے خاتمے کے لیے مزید رقم خرچ کرنے پر زور دیا گیا ہے۔

پانچ برس قبل اقوامِ متحدہ کے ملینئیم اجلاس میں یہ عزم ظاہر کیا گیا تھا کہ 2015 تک دنیا میں شرح ِ غربت کو نصف کرنے کی کوشش کی جائے گی۔ لیکن پانچ سال گزرنے کے باوجود یہ کوششیں بار آور ثابت ہوتی نظر نہیں آ رہیں۔

افریقہ میں بیماریوں، جنگ اور ترقی یافتہ ممالک کے عدم توجہی کی وجہ سے طے شدہ اہداف کا حصول ناممکن نظر آتا ہے۔

معیشت دان جیفری ساکس کی یہ رپورٹ منظور شدہ قراردادوں کے سلسلے میں اقوامِ متحدہ کے طرزِ عمل میں تبدیلی کی ایک کوشش ہے۔

اس رپورٹ میں کہا گیا ہے کہ اقوامِ عالم کو ایک مشترکہ لائحہ عمل اپنانے کی ضرورت ہے تاکہ غریب ترین ممالک میں غربت کے خاتمے سے متعلق پالیسیاں تشکیل دے کر ان عمل کیا جا سکے۔

اس بات کی توقع کی جا رہی ہے کہ برطانیہ میں اس رپورٹ کا خیر مقدم کیا جائے گا کیونکہ جی ایٹ ممالک کی تنظیم کے رکن کے طور پر برطانیہ بین الاقوامی ترقی خصوصا براعظم افریقہ کے ممالک میں دلچسپی رکھتا ہے۔

مبصرین کا یہ بھی کہنا ہے کہ اس رپورٹ میں غربت کے خاتمے کے لیے پیش کردہ حل مکمل طور پر قابلِ عمل نہیں ہیں۔ان کا کہنا ہے کہ اس رپورٹ میں اقریقی ممالک کے قرضوں کی ادائیگی سے متعلق کوئی واضح لائحہ عمل نہیں بتایا گیا ہے۔ اور نہ ہی افریقی ممالک سے یہ کہا گیا ہے کہ وہ قرضوں کی ادائیگی کا معاملہ اپنے ہاتھ میں لے لیں اور قرضوں پر سود کی ادائیگی بند کر دیں۔