شیرین عبادی کو خود بھی گرفتار کیے جانے کا خدشہ تھا

عبادی کو خود بھی گرفتار کیے جانے کا خدشہ تھا تاہم عدالت کے ایک اہلکار نے اب تصدیق کردی ہے کہ انہیں گرفتار نہیں کیا جائے گا۔

شیریں عبادی کے مطابق گو ایرانی قوانین میں قید تنہائی کی کوئی گنجائش نہیں، پھر بھی وسیع پیمانے پر اس کا استعمال ہوتا ہے۔

انہوں نےاس حوالے سے اپنا ذاتی تجربہ بھی بیان کیا کہ کس طرح بچپن کی تکلیف دہ یادیں جن پر انہوں نے چودہ برس کی عمر میں قابو پالیا تھا، قید تنہائی میں دوبارہ ان کے ذہن پر سوار ہوگئیں۔ ایران میں حزب اختلاف کے دیگر رہنما بھی بار بارقید تنہائی کے اپنے خوفناک تجربات بیان کرتے ہیں۔ بعض کے مطابق انہیں ایک برس سے بھی زائد عرصے تک ڈیڑھ مربع میٹر کے ایک سیل میں تنہا قید رکھا گیا جس کے دوران اکثر ان کو یا تو تاریکی یا پھر بہت تیز روشنی میں نیند سے محروم رکھا گیا۔

جن لوگوں کو ایرانی انقلاب کے ابتدائی دنوں میں گرفتار کیا گیا تھا، ان کے مطابق ان کواپنے سیل میں رات میں فائرنگ اسکواڈ کی کارروائی کی آوازیں آتی تھیں۔ اس کے مقابلے میں چار برس پہلے جن طالب علم رہنماؤں کو گرفتار کیا گیا تھا، وہ اس بات پر شکر گزار تھے کہ ان کوایران میں اصلاحات کے عمل کے دوران گرفتار کیا گیا تھا۔

ایک آدمی نے جس کو حال ہی میں جیل سے رہا کیا گیا، انٹرنیٹ پر لکھا ہے کہ اس کے لیے یہ بات تسلیم کرنا بہت مشکل ہے کہ اس طرح کا غیراخلاقی رویہ ایرانی جیلوں میں روا رکھا جاتا ہے۔ اس چھبیس سالہ شخص کو دو ماہ قید تنہائی میں رکھا گیا اور اس کا کہنا ہے کہ تفتیشی عمل کے مقابلے میں اس کو جیل کا اپنا سیل زیادہ محفوظ لگتا تھا۔