برطانیہ اور فرانس عراق کے مسئلے پر اختلاف رکھتے ہیں

برطانوی وزیرِاعظم ٹونی بلئیر اور فرانسیسی صدر ژاک شیراک جمعرات کو ہونے والی ملاقات کے بعد مشترکہ پریس کانفرنس سے خطاب کر رہے تھے۔

برطانوی وزیراعظم نے اس مرحلے پر ہم خیالی کی عکاسی کرنے والے پہلوؤں اور معاملات کی نشاندہی کرتے ہوئے افریقہ کا حوالہ دیا۔

ژاک شیراک کا فرانس اور برطانیہ کے دوستانہ تعلقات کی صد سالہ تقریبات کے آخری مرحلے پر برطانیہ آئے ہوئے ہیں۔

عراق کے مسئلے پر فرانس اور برطانیہ کے تعلقات میں کھنچاؤ کے بعد صدر ژاک شیراک کا یہ پہلا دورۂ برطانیہ ہے۔

صدر شیراک نے کہاہے کہ ایسے بہت سے’ کثیرالپہلو‘ شعبے ہیں جن میں فرانس اور برطانیہ شانہ بہ شانہ کام کر رہے ہیں۔

ان کا کہنا تھا کہ عراق ایک اور واحد معاملہ ہے جس پر دونوں اقوام کے درمیان عدم اتفاق ہے اور تاریخ بتائے گی کہ کون غلط ہے اور کون صحیح۔

بدھ کو صدر شیراک نے ایک بیان میں کہا تھا کہ انہیں اس بات کا یقین نہیں کہ صدام کے بعد یہ دنیا محفوظ ہو چکی ہے۔

اس سے پہلے وزیرِاعظم کے خصوصی ترجمان نے بتایا تھا کہ مذا کرات میں یورپی یونین، G8 گروپ میں برطانیہ کی ممکنہ صدارت، ماحولیاتی تبدیلی اور افریقہ اور افغانستان میں تعاون کے معاملات زیرِ غور آئیں گے۔

ترجمان نے اس بات کی بھی تصدیق کی تھی کہ دونوں رہنما شاید عراق کے مسئلے پر بات کریں۔

بدھ کو بی بی سی کے ساتھ ایک انٹرویو میں فرانسیسی صدر نے یہ عندیہ دیا تھا کہ عراق کی صورتِ حال نے دہشت گردی کو مزید ہوا دی ہے۔

اس انٹرویو میں ژاک شیراک نے کہا کہ عراق میں کسی بھی قسم کی مداخلت اقوامِ متحدہ کے ذریعے کی جانی چاہیئے تھی۔

انہوں نے کہا: ’اس میں کوئی شبہ نہیں کہ دہشت گردی میں اضافہ ہوا ہے جس کا ایک ماخذ عراق کی صورتِ حال ہے۔‘