 |  قتل کیا جانے والا عراقی پہلے سے زخمی تھا |
عراق میں امریکی فوج نے اعلان کیا ہے کہ ایک امریکی افسر پر پہلے سے طے شدہ منصوبے کے تحت ایک عراقی کے قتل کا الزام عائد کیا گیا ہے۔ یہ عراقی شہری پہلے سے زخمی تھا۔ فوج کے بیان میں کہا گیا ہے کہ لیفٹینٹ ایرک اینڈرسن نے اس عراقی کو بغداد کے نواح میں قتل کیا ہے۔ بیان میں اس واقعے کی مزید تفصیلات نہیں دی گئیں۔ عراق پر حملے اور قبضے کے بعد سے اب تک سات امریکی اور ایک برطانوی فوجی پر مختلف واقعات کے دوران عراقیوں کے قتل کے الزامات ہیں۔ امریکی فوج کا کہنا ہے کہ دیگر بہت سے واقعات ابھی زیر غور ہیں۔ اس سے قبل ستمبر میں امریکی فوج نے کہا تھا کہ دو امریکی فوجیوں پر تین عراقی شہریوں کے سوچ سمجھ کر کئے گئے قتل کے لئے مقدمہ چلایا جائے گا۔ ان دونوں کے نام مائیکل ولیم اور برینٹ مے بتائے گئے تھے۔ امریکی فوج کا کہنا تھا کہ اس سلسلے میں مزید تفصیلات شائع نہیں کی جاسکتیں کیونکہ جرائم کی تحقیقات کرنے والا فوجی ڈویژن معاملے کی تحقیقات کر رہا ہے۔ | 
یہ صفحہ دوست کو ای میل کیجیئے
پرِنٹ کریں
