انہوں نے کہا کہ ’میں یاسر عرفات اور حماس کے ان لیڈروں میں کوئی فرق نہیں محسوس کرتا جن کو اسرائیل قتل کراچکا ہے۔‘

ایریئل شیرون کے اس بیان پر فلسطینی کابینہ کے رکن صائب ارکات نے سخت تشویش کا اظہار کیا اور کہا ’ہمارا خیال ہے کہ اسرائیل امن کے عمل سے باہر نکلنے کے لیے یاسر عرفات کے قتل کو ایک سیاسی چال کے طور پر اختیار کررہا ہے تاکہ فلسطینی انتظامیہ تباہ ہوجائے اور فلسطینی باشندے بحران کی نذر ہوجائیں ۔،

ادھر تین نوجوان برطانوی مسلمان لڑکیوں نے جو اسرائیل گئی ہوئی ہیں بتایا ہے کہ اسرائیلی حکام نے انہیں پیر تک ملک چھوڑنے کا حکم دیا ہے۔

لڑکیوں نے بی بی سی کو بتایا کہ وہ یروشلم میں فلسطینی بچوں کے لۓ امدادی کام کرنے ایک ہفتے پہلے آئی تھیں۔ جمعے کو علی الصباح سکیورٹی کے کوئی بیس آدمیوں نے انہیں جگایا، کپڑے اتروا کے ان کی جامہ تلاشی لی اور پھر پوچھ گچھ کے لیے لے گۓ۔ انہیں چھوڑنے سے پہلے ہدایت کردی گئی کہ یروشلم سے باہر نہ جائیں۔