سفارت خانہ غیرمعینہ مدت کیلئے بندکردیا گیا تھا

ایک ہفتے قبل ڈاک کے ذریعے ملنے والے ایک لفافہ میں مشتبہ پاؤڈر کی وجہ سے سفارت خانے کو بند کرنا پڑا تھا اور عملے کے تمام ارکان کو عمارت خالی کرنے کا حکم دیا گیا تھا۔

اس موقع پر امریکن سنٹر بھی جو کہ سفارت خانے کے قریب ہے، بند کردیا گیا تھا۔ اب سفارت خانے میں پیر کے روز سے حسب معمول کام شروع ہوجائے گا۔

امریکی سفارت خانے کے ایک ترجمان کا کہنا ہے کہ لیبارٹری میں کیے جانے والے ٹیسٹ سے معلوم ہوا کہ پاؤڈر میں اینتھرکس یا اس جیسی کوئی خطرناک جراثیمی چیز نہیں تھی۔

گزشتہ ماہ ایک مشتبہ تامل باغی خودکش بمبار نے امریکی سفارت خانے کے قریب پولیس تھانے کے پاس خود کو اڑا دیا تھا۔ امریکہ سفارت خانہ اور برطانوی ہائی کمیشن پاس پاس ہیں۔