تینوں گلوکارائیں 1960 کے مشہور گانے ’ویک اپ ایوری باڈی‘ (یعنی ’سب جاگ جاؤ‘) کی نئی ریکارڈنگ کر رہی ہیں۔ یہ گانا 1976 کے صدارتی انتخابات میں کالے ووٹروں کو جمی کارٹر کے حق میں ووٹ ڈالنے پر آمادہ کرنے کے لیے استعمال کیا گیا تھا۔

’امریکہ کمنگ ٹوگیتھر‘ نامی گروپ امریکی صدارت میں تبدیلی کا حامی ہے۔ یہ گانا اسی گروپ کے ایک البم کا حصہ بنےگا۔ اس کے علاوہ مارون گائے، لنڈا رونڈسٹاڈ اور یوکو اونو کے گانے بھی اس البم میں شامل ہونگے۔

’ویک اپ ایوری باڈی‘ دراصل ’ہیرالڈ ملون اینڈ دی بلو نوٹس‘ نامی گروپ کا گانا ہے جس کا استعمال ڈیموکریٹس نے کئی بار کیا ہے۔

ہیرالڈ ملون اور ان کے بینڈ نے یہ گانا 2000 کے ڈیموکریٹک کنوینشن میں گایا تھا۔

اس گانے کی نئی ریکارڈنگ کے پروڈیوسر کینی ایڈمنڈز ہیں۔ انہوں نے کہا کہ یہ گانا ملک کی روح کی مانند ہے اور یہ فنکار اسے بدلنے کی کوشش کریں گے۔

’ووٹ فار چینگ‘ (یعنی تبدیلی کے لیے ووٹ) کے نام سے کئی فنکار اور گلوکار صدر بش کے خلاف کنسرٹس میں حصہ لے رہے ہیں۔ ان میں بروس سپرنگسٹین، پرل جیم اور دی ڈکسی چکس شامل ہیں۔

نومبر میں ہونے والےصدراتی انتخابات سے پہلے یہ فنکار امریکہ کے 28 شہروں کا دورہ کریں گے۔ انہیں ’امریکہ کمنگ ٹوگیتھر‘ کی حمایت حاصل ہے۔