غزہ میں جبالی کے بہت دشمن ہیں

ایک غیر معروف فلسطینی انتہا پسندگروہ جنین مارٹرز بریگیڈ نے جبالی کو غزہ کے جنوب میں اس وقت اغواء کیا تھا جب وہ گاڑیوں کے قافلے میں ساحلی شاہراہ پر جا رہے تھے ۔ مسلح افراد نے ان کے قافلے پر حملہ کر کے انہیں اغواء کر لیا تھا۔ حملے میں ان کے دو محافظ اس حملے میں زخمی ہو گئے ہیں۔

اغواء کے بعد انہیں غزہ کے مہاجر کیمپ بریج میں ایک گھر میں رکھا گیا تھا جہاں گھر کے ارد گرد عمارتوں کی چھتوں پر نقاب پوش مسلح افراد پوزیشنیں سنبھالے ہوئے تھے۔

غزہ میں بی بی سی کے نامہ نگار ایلن جانسن کا کہنا ہے کہ کچھ عرصہ سے پتہ چل رہا تھا کہ غزہ میں جبالی کے بہت سے طاقتور دشمن ہیں۔ چند ماہ پہلے انتہا پسندوں نے ان کے دفتر میں ان پر حملہ کیا تھا اور اس کے کچھ ہی عرصہ بعد ان کے گھر پر حملہ کیا گیا۔

اغواء کنندگان ان کی بد عنوانیوں کے خلاف کارروائی کا مطالبہ کر رہے تھے۔

جبالی کی رہائی فلسطینی حکام کی اغواء کنندگان کے ساتھ مذاکرات کے نتیجے میں عمل میں آئی۔ تا ہم یہ معلوم نہیں ہوا کہ ان کی رہائی کن شرائط پر ہوئی ہے۔

نامہ نگار کا کہنا ہے کہ پولیس سربراہ ہونے کے ناطے ایسی صورتحال میں معاشرے میں امن وامان قائم کرنا مشکل ہوجاتا ہے جب وہاں ہر طرف بہت سے مسلح گروہ موجود ہوں۔ باقی اہم سرکاری اہلکاروں کی طرح جبالی پر بھی رشوت اور بدعنوانیوں کے الزامات ہیں اور غزہ کے لوگ انہیں نا پسند کرتے ہیں۔