غزہ میں جبالی کے بہت دشمن ہیں

تازہ ترین اطلاعات میں فلسطینی حکام کے حوالے سے کہا گیا ہے کہ اغواء کنندگان پولیس سربراہ کو رہا کرنے کے لیے تیار ہیں تا ہم یہ معلوم نہیں ہوا کہ ان کی رہائی کب ہوگی۔

عینی شاہدوں کا کہنا ہے کہ جمعہ کو غازی جبالی گاڑیوں کے قافلے میں غزہ کی پٹی کے جنوب میں ساحلی شاہراہ پر جا رہے تھے جب مسلح افراد نے ان پر حملہ کر دیا اور انہیں اغواء کر لیا۔ اطلاعات کے مطابق انہیں غزہ کے مہاجر کیمپ بریج میں ایک گھر میں رکھا ہوا ہے اور گھر کے ارد گرد عمارتوں کی چھتوں پر نقاب پوش مسلح افراد پوزیشنیں سنبھالے ہوئے ہیں۔

فلسطینی انتہا پشند گروہ جنین مارٹرز بریگیڈ نے دعویٰ کیا ہے کہ جبالی کو انہوں نے اغواء کیا ہے۔ تا ہم انہوں نے یہ نہیں بتایا کہ یہ اغواء کیوں کیا گیا ہے۔

غزہ میں بی بی سی کے نامہ نگار ایلن جانسن کا کہنا ہے کہ کچھ عرصہ سے پتہ چل رہا تھا کہ غزہ میں جبالی کے بہت سے طاقتور دشمن ہیں۔ چند ماہ پہلے انتہا پسندوں نے ان کے دفتر میں ان پر حملہ کیا تھا اور اس کے کچھ ہی عرصہ بعد ان کے گھر پر حملہ کیا گیا۔

نامہ نگار کا کہنا ہے کہ پولیس سربراہ ہونے کے ناطے ایسی صورتحال میں معاشرے میں امن وامان قائم کرنا مشکل ہوجاتا ہے جب وہاں ہر طرف بہت سے مسلح گروہ موجود ہوں۔ باقی اہم سرکاری اہلکاروں کی طرح جبالی پر بھی رشوت اور بدعنوانیوں کے الزامات ہیں اور غزہ کے لوگ انہیں نا پسند کرتے ہیں۔