اعجاز مہر بی بی سی اردوڈاٹ کام، اسلام آباد

شوکت عزیز کے مقابل امیدوار کے لیے اے آر ڈی کا اجلاس

پاکستان مسلم لیگ نواز کے رہنما راجہ ظفرالحق کے مطابق اجلاس میں ان کی کوشش ہوگی کہ حزب اختلاف متفقہ امیدوار پر راضی ہو جائے۔

شوکت عزیز کو رکن قومی اسمبلی بنانے کے لیے وزیراعظم کی بھانجی ایمان وسیم نے اٹک کے قومی اسمبلی کے حلقہ 59، جبکہ صوبہ سندھ کے وزیراعلیٰ کے بھانجے ارباب ذکاءاللہ نے تھرپارکر کے حلقہ 229 سے استعفیٰ دیا تھا۔

شوکت عزیز سمیت حکمران جماعت کے تین امیدواروں نے تھرپارکر سے کاغذات نامزدگی داخل کر رکھے ہیں جبکہ پاکستان پیپلز پارٹی پارلیمنٹیرینز کے تین اور متحدہ مجلس عمل کے دو، پاکستان پیپلز پارٹی ( شہید بھٹو) کے ایک اور ایک آزاد امیدوار نے بھی کاغذات نامزدگی داخل کیے ہیں۔

تھرپارکر کی نشست سے مسلم لیگ نواز کے کسی امیدوار نے کاغذات نامزدگی داخل نہیں کیے اور اس حلقہ سے اصل مقابلہ شوکت عزیز اور پارلیمنٹیرینز کے امیدوار میں ہوگا۔ اس حلقے میں پچاس فیصد کے قریب ووٹ اقلیتوں کے ہیں اور شاید یہ ہی سبب ہے کہ پارلیمنٹیرینز نے اقلیتی امیدوار ہی نامزد کیے ہیں۔

اے آر ڈی کی دونوں بڑی جماعتوں پاکستان پیپلز پارٹی پارلیمنٹیرینز اور مسلم لیگ نواز کے درمیان اٹک کی نشست پر اختلاف رائے پایا جاتا ہے۔ مسلم لیگ کا مطالبہ ہے کہ سندھ سے پیپلز پارٹی اور پنجاب کی نشست پر مسلم لیگ کا متفقہ امیدوار ہونا چاہیے۔

اس سے پہلے لاہور میں اے آر ڈی کا اجلاس دو دن تک جاری رہا تھا لیکن متفقہ امیدوار لانے پر اتفاق نہیں ہو سکا تھا۔

اٹک سے اب تک کل سولہ امیدواروں نے کاغذات نامزدگی داخل کیے ہیں جس میں حکمران مسلم لیگ، مسلم لیگ نواز اور متحدہ مجلس عمل کے دو دو جبکہ پاکستان پیپلز پارٹی کے تین امیدواروں نے کاغذات نامزدگی داخل کیے ہیں۔ دیگر سات امیدوار آزاد ہیں۔

دونوں حلقوں میں ضمنی انتخابات کے شیڈول کے مطابق سنیچر کی شام چار بجے تک جانچ پڑتال مکمل کی جائے گی۔ امیدواروں کے کاغذات نامزدگی واپس لینے کی آخری تاریخ بیس جولائی ہے جبکہ پولنگ اٹھارہ اگست کو ہو گی۔