البرادعی مشرق وسطی کو جوہری ہتھیاروں سے پاک کرنے کی کوششیں کر رہے ہیں

اسرائیلی وزیر اعظم ایریئل شیرون سے ملاقات کے بعد ان کا کہنا ہے ’جوہری اسلحہ سے پاک مشرق وسطٰی کے قیام کے بارے میں امید کی کرن پیدا ہوئی ہے‘۔

البرادعی کے مطابق شیرون نے کہا ہے کہ ایسا کرنے کے لیے ضروری ہے کہ پہلے خطہ میں امن قائم ہو۔

ان کا کہنا ہے کہ یہ پالیسی میں تبدیلی نہیں ہے بلکہ ’مختلف الفاظ کا استعمال‘ ہے۔

البرادعی اور شیرون کے درمیان یہ جمعرات کی صبح یروشلم میں ہوئی اور ایک گھنٹے سے زیادہ چلی۔

مشرق وسطیٰ جوہری ہتھیاروں سے پاک خطہ بنانا محمد البرادعی کی ترجیحات میں سے ہے جبکہ اسرائیل اپنے جوہری پروگرام کے بارے میں ابہام کی پالیسی پر کار بند ہے۔

مبصرین کے خیال میں اسرائیل کے پاس دو سو کے قریب جوہری ہتھیار موجود ہیں جبکہ اسرائیل نے اپنے جوہری پروگرام کا کبھی اعتراف نہیں کیا۔

محمد البرادعی کے اسرائیل پہنچنے سے دو دن قبل اسرائیل نے پہلی مرتبہ نقب صحرا میں واقع اپنی جوہری تنصیبات کی تصاویر ایک سرکاری ویب سائیٹ پر شائع کی تھیں۔

اسرائیل ایران کے جوہری پروگرام کے بارے میں اپنے خدشات ظاہر کرتا رہا ہے اور اپنے جوہری پروگرام کے بارے میں کس قسم کی تفصیل مہیا کرنے سے بھی گریز کرتا رہا ہے۔

اسرائیل نے جوہری عدم پھلاؤ کے عالمی معاہدے پر بھی دستخط نہیں کئے اس لیے وہ انٹرنشنل اٹامک ایجنسی کے معائنہکرنے کے دائرہ اختیار سے بھی باہر ہے۔

جبکہ ایران اس معاہدے پر دستخط کر چکا ہے اور ائی اے ای اے کے معائنہ کار اس کی جوہری تنصیبات کا معائنہ کر چکے ہیں۔