ایک فلسطینی اور اس کا بیٹا جواسرائیلی حملے میں زخمی ہوئے۔

بیت الحنون میں لڑائی رات کو شروع ہوئی۔ اسرائیلی فوج پچھلے مہینے بیت الحنون میں داخل ہوئی تھی۔

اسرائیلی فوج کا کہنا ہے کہ وہ اس علاقے میں کارروائی اسرائیلی علاقوں پر راکٹ فائر ہونے کے امکانات کو ختم کرنے کے لیے کر رہی ہے۔

بدھ کو تین فلسطینی اس وقت زخمی ہو گئے تھے جب ایک اسرائیلی گن شپ ہیلی کاپٹر نے ایک کار پر میزائیل فائر کیا جس میں ، اسرائیل کے مطابق، حماس کے لوگ سفر کر رہے تھے۔زخمی ہونے والوں میں ایک تین سال ک بچہ بھی شامل ہے۔

اسرائیل نے اس سال میزائیل حملوں میں حماس کے لیڈر شیخ احمد یاسین اور عبدل العزیز رنتیسی کو بھی ہلاک کیا تھا۔

بیت الحنون کے علاوہ اسرائیلی فوج جنوبی غزہ کے علاقے میں کارروائی کر رہی ہے اور بکتر بند گاڑیاں اور بلڈوزر خان یونس کے علاقے میں داخل ہو گئے ہیں۔

اسرا ئیلی فوج کے ایک ترجمان کا کہنا ہے کہ وہ خان یونس میں اس عمارت کو تباہ کرنا چاہتے ہیں جہاں سے اسرائیلی علاقوں ہر راکٹ فائر کیے گئے تھے۔

تشدد کی نئی لہر اس وقت شروع ہوئی ہے جب امریکہ ، یورپین یونین، روس اور اقوام متحدہ کے مصالحت کاروں نے امن کے عمل کو بحال کرنے کے لیے فلسطینی وزیر اعظم احمد قریع سے ملاقات کر رہے تھے۔

مصالحت کاروں نے فلسطینی اتھارٹی کو کہا ہے کہ وہ تشدد کو روکنے کے لیے مزید اقدامات کرئے۔

فلسطینی وزیر اعظم احمد قریع نے مصالحت کاروں کو کہا کہ وہ فلسطینی علاقوں میں اسرائیلی آبا کاری اور اسرائیلی باڑ کے بارے میں ایک واضح موقف اپنائے ۔