تصویر لندن میں پائی گئی

اس تصویر کا نام ’ دی بلیک کرائسٹ‘ ہے۔ اس میں افریقی نیشنل کانگریس کے سربراہ چیف البرٹ لوتھولی کو وزیر اعظم ہنڈرک ورورڈ اور وزیر انصاف جان وورسٹر کے ہاتھوں سولی چڑھتے ہوئے دکھایا گیا ہے۔

یہ تصویر کیپ ٹاون کے فنکار رونی ہیرسن نے 1961 میں بنائی تھی اور اب کیپ ٹاون کی نیشنل گیلیری میں اس کی نمائش چل رہی ہے۔

آج کل یہ تصویر جمہوریت کے دس سال مکمل ہونے پر ہو نے والی نمائش کا مرکزی حصہ ہے۔

اس تصویر کی تاریخ بہت دلچسپ ہے۔

1962 میں اسے جنوبی افریقہ سے لندن کے سینٹ پال کتھیڈرل تک خفیہ طور پر پہنچایا گیا تھا۔

یہ کافی عرصے تک سینٹ پال میں ہی رہی اور یورپ کے دورے پر اس تصویر نے افریقہ میں نسل پرستی کے خلاف پیسے جمع کرنے میں مدد کی۔

مگر جب اس بات کی خبر جنوبی افریقہ کی حکومت کو ہوئی تو انہوں نے رونی ہیریسن کو گرفتار کر لیا اور انہیں شدید اذیتیں دیں۔ مسٹر ہیریسن کا کہنا ہے کہ سات روز تک ان کے ساتھ بہت برا سلوک کیا گیا۔

’دی بلیک کرائسٹ‘ لگ بھگ تیس سال تک غائب تھی۔ پھر ایک روز لندن میں رہنے والے ایک جنوبی افریقی سابق کمیونسٹ نے اخبار میں اس تصویر کے حوالے سے ایک اپیل دیکھی۔ تب انہیں احساس ہوا کہ وہ تصویر ان کے گھر کے تہ خانے میں تھی۔

کہا جاتا ہے کہ اس علاقے میں باڑ آنے کے باوجود اس تصویر کو کوئی نقصان نہیں پہنچا۔

مسٹر ہیریسن کا خیال ہے کہ اس تصویر کی حفاظت کسی خدائی طاقت نے کی ہے۔

1997 میں تصویر ایک بار پھر جنوبی افریقہ پہنچ گئی مگر اب تک اس کی نمائش نہیں کی گئی تھی۔ نمائش کی ترتیب میں بہت بڑا ہاتھ چیف لوتھولی کی بیٹی البرٹینا لوتھولی کا ہے۔