 |  غزہ میں راکٹ حملے بدستور جاری |
غزہ میں فلسطینوں کی طرف سے کیے گئے دو راکٹ حملوں میں ایک بچی سمیت دو اسرائیلی ہلاک اور نو زخمی ہو گئے ہیں۔ غزہ کی پٹی سے داغے گئے دو راکٹ اسرائیلی قصبے سدروت میں ایک عمارت میں لگے ۔ اس عمارت کے پاس ہی بچوں کا سکول بھی ہے۔ مرنے والوں میں ایک تین سال کا بچہ بھی شامل ہے۔ غزہ کے علاقے سے راکٹ داغے جانا نئی بات نہیں ہے لیکن یہ پہلا موقع ہے کہ راکٹ حملے سے کوئی ہلاک ہوا ہے۔ اس سے پہلے ایک اسرائیلی فوجی چوکی پر زبردست دھماکہ ہوا جس میں ایک فوجی ہلاک اور پانچ زخمی ہو گئے۔ فوجی چوکی پر اس حملے کے کچھ دیر بعد اسرائیلی فوجی ہیلی کاپٹروں نے زیتون کے علاقے میں دو ورک شاپوں کو میزائیلوں سے نشانہ بنایا جس میں کوئی جانی نقصان نہیں ہوا۔ اس کے علاوہ اسرائیلی فوج نے خان یونس کے پناہ گزیں کیمپ پر فائرنگ کر کے ایک فلسطینی سیکیورٹی اہلکار اور ایک بچے کو ہلاک کر دیا ہے۔ اسرائیلی فوج کا کہنا تھا کہ پناہ گزیں کیمپ سے اسرائیلی فوج پر زبردست فائرنگ کی جا رہی تھی جس کے جواب میں انہوں نے فائرنگ کی۔ | 
یہ صفحہ دوست کو ای میل کیجیئے
پرِنٹ کریں
