امریکی فوج نے ان الزامات کی تردید کی ہے کہ اس کے فوجیوں نے عراق کے ایک مغربی علاقے میں ایک حملے میں ایسے درجنوں افراد کو ہلاک کردیا ہے جو اس وقت شادی کی ایک تقریب میں شریک تھے۔ پہلے آنے والی اطلاعات کے مطابق شام کے بارڈر کے قریب ایک شادی کی تقریب پر امریکی حملے سے کئی درجن افراد ہلاک ہوگئے تھے۔عربی ٹی وی چینل العربیہ نے پہلے بتایا تھا کہ اس شادی کی تقریب میں لوگوں کی طرف سے جشن مناتے ہوئے ہوائی فائرنگ کے بعد امریکی فوج نے حملہ کردیا تھا۔ امریکی فوج کے ترجمان نے اس بات کی تصدیق کی ہے کہ اس علاقے میں چالیس کے قریب افراد ہلاک ہوئے ہیں لیکن ترجمان کے مطابق امریکی فوج کا نشانہ ایک ایسا ٹھکانہ تھا جس میں غیر ملکی جنگجوؤں نے پناہ لے رکھی تھی۔ ترجمان کے مطابق اتحادی فوج نے اس کی طرف فائرنگ کئے جانے کے بعد جواباً حملہ کیا تھا۔ عراق میں امریکی فوج کے آپریشنز کے ڈپٹی انچارج بریگیڈ ئیر جنرل مارک کیمیٹ نے کہا کہ اس طرح کا کوئی اشارہ نہیں ملا کہ حملہ کرنے والے لوگ شادی کی تقریب کا حصہ تھے۔ انہوں نے بتایا کہ حملے کے بعد اس جگہ سے بہت بڑی رقم، شام کے پاسپورٹ اور سیٹیلائٹ فون وغیرہ بھی ملے ہیں۔ | 
یہ صفحہ دوست کو ای میل کیجیئے
پرِنٹ کریں
