کولن پاؤل ایک اقتصادی کانفرنس کے سلسلے میں دیگر عالمی رہنماؤں کے ساتھ اردن پہنچ رہے ہیں۔

گزشتہ سال اقتدار سنبھالنے کے بعد احمد قریع کی امریکی انتظامیہ کے کسی اعلیٰ عہدیدار سے یہ پہلی ملاقات ہو گی۔

اردن میں عالمی اقتصادی فورم کے تحت ایک ہزار سے زائد وفود، سربراہانِ مملکت، وزراء اور سینکڑوں کمپنیاں اور غیر سرکاری تنظیموں کے نمائندے بھی موجود ہوں گے۔

خیال ہے کہ فلسطینی وزیرِ اعظم اور امریکی وزیرِ خارجہ کے درمیان ملاقات میں عراق کی تازہ ترین صورتِ حال اور عرب دنیا میں امریکہ کی جمہوری اصلاحات کے منصوبے پر بھی بات چیت ہوگی۔

اس کانفرنس میں پہلی مرتبہ شام بھی شریک ہو رہا ہے جہاں اس کے نمائندے اسرائیل کے کاروباری اور سیاسی رہنماؤں سے بات چیت کر سکیں گے۔