شفیق رسول اور آصف اقبال کا کہنا ہے کہ ان کے ساتھ جان بوجھ کر بے عزتی کا سلوک کیا گیا اور وہاں موجوں گارڈز نے ان کو ڈرانے دھمکانے کے لئے کتوں اور بلند آواز میں میوزک کا استعمال کیا جس میں خاص طور پر ایم این ایم نامی گلوکار کے گانے شامل تھے۔

گوانتا نامو میں ایک امریکی اہلکار نے ان الزامات کی تردید کی ہے اور کہا ہے کہ انہوں نے ان میں سے کوئی بھی طریقہ استعمال نہیں کیا۔

شفیق رسول اور آصف اقبال نے صدر بش اور امریکی سینیٹ کی کمیٹی کو اپنے خط میں یہ بھی لکھا ہے کہ اکثر قیدیوں کو معمولی خلاف ورزیوں کے لئے سزا کے طور پر خواتین عملے کے سامنے ننگا کھڑا کیا جاتا تھا۔

ان کا یہ بھی کہنا ہے کہ ان کے ہاتھ پیروں کے ساتھ باندھ کر انہیں بیٹھے رہنے پر مجبور کیا جاتا تھا اور وہاں موجود فوجی کہتے تھے کہ وہ جو چاہیں کر سکتے ہیں۔

ان دونوں برطانوی شہریوں کا کہنا ہے کہ انہیں یہ اعترافی بیان دینے پر مجبور کیا گیا کہ سن دوہزار میں جاری ہونے والی ایک ویڈیو ٹیپ میں اسامہ بن لادن کے ساتھ وہ دونوں بھی موجود ہیں۔

شفیق رسول اور آصف اقبال ان پانچ برطانوی شہریوں میں ہیں جنہیں بغیر کسی الزام کے چھوڑ دیا گیا تھا۔