ایمبون فسادات کے بعد پولیس پر اپنے طرزعمل کے حوالے سے بہت دباؤ تھا

ایمبون فسادات کے بعد پولیس پر اس کے طرزعمل کے حوالے سے بہت دباؤ تھا۔ شہر میں ایک چھوٹی سی ریلی مسلمانوں اور عیسائیوں کے درمیان گلی گلی لڑائی میں بدل گئی تھی اور مبصرین پولیس پر تنقید کررہے ہیں کہ وہ تشدد کی پیش بندی کرنے میں مکمل طور پر ناکام رہی اور اس کے آغاز کے بعد بھی وہ صورتحال کو قابو کرنے میں ناکام رہی۔

لیکن اب ایسا محسوس ہورہا ہے کہ پولیس سربراہ بریگیڈئیر جنرل بمبانگ سترسنو پر اس کی ذمہ داری عائد کی گئی ہے اور ان کو عہدے سے ہٹا کردارالحکومت جکارتہ بلالیا گیا ہے۔ پولیس کے ایک ترجمان کے مطابق یہ فیصلہ مقامی افراد سے مشاورت کے بعد کیا گیا ہے۔ترجمان کے مطابق ایسا لگتا ہے کہ جنرل سترسنو نے کاروائی میں تاخیر کی۔ اب حکومت یہ چاہتی ہے کہ جولائی میں صدارتی انتخابات سے پہلے صورتحال مکمل طور پر مستحکم ہو اور اس مقصد کے لیے ایک نئے فرد کی ضرورت ہے۔

فسادات کے بعد اب ایمبون میں خاصا سکون ہے اور پولیس ہتھیاروں کی تلاش میں گھرگھر تلاشی لے رہی ہے۔پولیس نے چونتیس مشتبہ علیحدگی پسندوں کو گرفتار کیا ہے۔ ان میں اس عیلحدگی پسند رہنما کی بیوی اور بیٹی بھی شامل ہیں جو خود امریکہ میں جلاوطنی کی زندگی گزار رہے ہیں۔تاہم محسوس ایسا ہوتا ہے کہ یہ سب کچھ بھی جنرل سترسنو کے خلاف کاروائی روکنے کے لیے ناکافی تھا۔