گزشتہ ماہ نجف میں امریکی فوجیوں اور مقتدٰی الصدر کے حامیوں کے مابین جھڑپوں میں متعدد افراد ہلاک ہوگئے تھے۔

تفصیلات کے مطابق عراق کے شہر نجف میں امریکی بمباری سے پانچ عراقی ہلاک اور سولہ زخمی ہوگئے ہیں۔

خبروں میں کہا گیا ہے کہ امریکی فوج نے اس وقت ایک صنعتی علاقے پر بمباری کی جب نجف سے باہر ان کے اڈے پر مارٹر حملہ کیا گیا۔

ادھر بغداد کے جنوب میں ایک حملے میں اسلحہ ڈپو کی رکھوالی کرنے والا ایک امریکی فوجی ہلاک اور دو زخمی ہوگئے ہیں۔

بعد میں مغربی صوبہ انبار میں بھی ایک امریکی فوجی کو ہلاک کر دیا گیا۔

اس سے قبل اتوار کے روز امریکی فوجیوں پر ہونے حملوں میں مجموعی طور پر نو فوجی ہلاک جبکہ چالیس زخمی ہوگئے تھے۔ان حملوں میں تین عراقی بھی مارے گئے تھے۔