ناقدین کے بقول اورانیا میں لوگ ابھی تک ماضی میں رہ رہے ہیں

اورانیا شمالی کیپ میں موجود ایک چھوٹا قصبہ ہے جس میں سفید فام آفریکانرز رہتے ہیں۔ ان میں نسلی امتیاز کی پالیسی کے خالق ہینرک وروڈ کا پوتا بھی شامل ہے۔

اورانیاسے جاری ہونے والی کرنسی کو اورا کہا جائے گا جس کے چار درجے (نوٹ یا سکے) ہوں گے۔

اورانیا کی ایک ترجمان الین لمبارڈ نے بتایا کہ یہ کرنسی صرف قصبے کے اندر ہی استعمال کی جائے گی اور اگر کوئی اسے چرا بھی لے تو اس کے لئے اس کا کوئی فائدہ نہیں ہو گا۔

ترجمان نے کہا کہ ’ہم اصل میں ایک خود مختار کمیونٹی کے نظریے پر کام کر رہے ہیں‘۔

’10 اورا کا نوٹ افریکانرز کی تاریخ دکھاتا ہے، 20 کا نوٹ آرٹ، 50 کا کلچر اور 100 کا نوٹ اورانیا کے قصبے کے متعلق بتاتا ہے۔‘

قصبے میں ایک میوزیم ہے جہاں افریکانرز کی تاریخ کے متعلق چیزیں رکھی گئی ہیں

اورانیا قصبے کے ترجمان نے بی بی سی کو بتایا کہ کرنسی کا ڈیزائن ایک مقامی آرٹسٹ نے بنایا ہے۔ اس کے اجراء کی تقریب مقامی ٹاؤن ہال میں ہو گی۔

مس لمبارڈ نے کہا کہ کرنسی کے اجراء کا یہ مطلب نہیں لینا چاہیئے کہ اورانیا کی سفید فام برادری کثیر نسلی جنوبی افریقہ کو نہیں مانتی۔

ان کا کہنا تھا کہ ’جنوبی افریقہ ایک فروٹ سلاد کی طرح ہے۔ اگر مجھے میری مرضی کے مطابق کیلا، سیب یا جو بھی میں بننا چاہوں بننے دیا جائے تو میں اس سلاد کے مزے میں اپنا حصہ ڈال سکتی ہوں‘۔

انہوں نے کہا کہ اگر ان کی انفرادیت برقرار نہیں رکھی جا سکتی تو وہ معاشرے میں کوئی کردار ادا نہیں کر سکتیں۔

اورانیا میں رہنے والے 600 باشندوں میں سے اکثر کہتے ہیں کہ وہ جنوبی افریقہ میں تشدد اور جرم کی بڑھتی ہوئی لہر سے بچنے کے لئے یہاں اکٹھے ہو رہے ہیں۔