قابض فوجوں کے خلاف غصّہ کا اظہار

سخت گیر شیعہ رہنما مقتدٰی الصدر کے حمایتوں نے عراق کے کم سے کم چار شہروں میں پرتشدد مظاہرے کیے ہیں۔

ان کی ملیشیا نے ملک کے اہم شہروں پر قبضے کی کوشش کی جس کے بارے میں اتحادی قابض فوج کا کہنا ہے کہ ان کارروائیوں کو برداشت نہیں کیا جائے گا۔

ادھر فلوجہ میں بھی امریکی فوج نے کارروائی کا آغاز کیا ہے۔ یہ سنّی اکثریت والا علاقہ ہے جہاں گزشتہ ہفتے چار امریکیوں کو ہلاک کرنے کے بعد ان کی لاشوں کو مسخ کر دیا گیا تھا۔

یہ مظاہرے گزشتہ ہفتے مقتدٰی الصدر کے اخبار کی بندش اور ہفتے کے روز ان کے ساتھی مصطفٰی یعقوبی کی گرفتاری کے بعد شروع ہوئے ہیں۔

اس سے قبل عراقی میں شیعہ رہنما مقتدیٰ الصدر کے حامیوں نے بصرہ میں گورنر کے دفتر پر قبضہ کرلیا تھا۔ بصرہ میں موجود بی بی سی کے نامہ نگار کا کہنا ہے کہ تقریباً ایک سو پچاس افراد نے عمارت پر قبضہ کررکھا ہے جبکہ مزید کئی عمارت کے باہر جمع ہیں۔

دریں اثناء بغداد میں شیعہ مظاہرین اور اتحادی فوج کے درمیان تازہ جھڑپوں کی اطلاعات ہیں۔ خبر رساں ادارے رائٹرز کے مطابق افواج اپاچی ہیلی کاپٹروں کے ذریعے ان علاقوں پر فائرنگ کررہی ہیں جہاں شیعہ اکثریت میں ہیں۔ اس سے قبل علاقے میں ایک امریکی فوجی گاڑی کے جلنے کی خبر بھی تھی۔

ایک ہی روز قبل بغداد کے علاقے صدر شہر میں اتحادی فوج اور مقتدیٰ الصدر کی عسکریت پسند تنظیم جیش مہدی کے درمیان شدید جھڑپوں میں تیس افراد ہلاک ہوئے جن میں سات امریکی فوجی شامل ہیں جبکہ چوبیس زخمی ہونے ہیں۔

قابض افراد کہنا ہے کہ وہ اس وقت تک عمارت نہیں چھوڑیں گے جب تک ان کے مطالبات پورے نہیں کیے جاتے۔ امریکی قیادت والی فوج کے قبضہ سے اپنے ساتھیوں کی بازیابی ان کے مطالبات میں سر فہرست ہے۔

برطانوی ٹینک علاقے میں داخل ہونے کے بعد اب عمارت کا محاصرہ کیے ہوئے ہیں تاہم ابھی تک کسی جھڑپ کی اطلاع نہیں ہے۔

ساتھ ہی سنی اکثریت والے علاقے فلوجہ میں امریکی فوجیوں نے ناکہ بندی کررکھی ہے۔ یہاں گزشتہ ہفتے کے تشدد آمیز واقعات میں چار امریکی ہلاک ہوئے تھے۔

اتوار کو صدر شہر میں امریکی فوج اور جیش مہدی کے کارکنوں کے درمیان اس وقت تصادم ہوا جب جیش مہدی کے کارکنوں نے صدر شہر میں ایک تھانے پر قبضے کی کوشش کی۔

امریکی فوج کے مطابق اس نے جانی نقصان کے باوجود جیش مہدی کی اس کوشش کو ناکام بنادیا تھا۔

مقتدیٰ الصدر امریکی قیادت والی اتحادی افواج کے قبضے کے شدید خلاف ہیں۔ اتحادی افواج نے حال ہی میں ان کے ایک ساتھی شیخ یعقوبی گرفتار کیا تھا۔ اس کے علاوہ عراق کے ایک روز نامے پر بھی پابندی عائد کی گئی ہے کیونکہ اتحادیوں کا خیال ہے کہ یہ اخبار امریکہ مخالف جذبات بھڑکاتا ہے۔

عراق میں امریکی انتظامیہ کے سربراہ پال بریمر کا کہنا ہے کہ وہ مقتدٰی کی جانب سے اختیارات حاصل کرنے کے کسی ناجائز چیلنج کو برداشت نہیں کریں گے۔

بصرہ اور صدر شہر کے علاوہ عراق کے دوسرے شیعہ اکثریتی علاقوں میں بھی مقتدیٰ الصدر کے حامیوں نے امریکی قبضے کے خلاف شدید احتجاج کیا ہے۔