بیلجیئم کے عدالتی اہلکاروں نے بتایا کہ ڈیزائر پر الزام ہے کہ انہوں نے روانڈا کے ایک بچے کو اپنا بچہ ظاہر کر کے وہاں لانا چاہا۔ کپتان ڈیزائر بیلجیئم کی فرسٹ ڈویژن میں ٹیم میں کھیلتے ہیں۔

استغاثے کے ترجمان کا کہنا ہے کہ روانڈا کے کپتان پیر تک جیل کی سلاخوں کے پیچھے رہیں گے اور اس دوران مزید انکوائری جاری رہے گی۔

اسی الزام میں روانڈا کے ایک جوڑے سے بھی تفتیش کی جا رہی ہے۔

اس سال کے اوائل میں کانگو کے گلوکار پاپا ویمبا پر بھی بیلجیئم میں انسانی سمگلنگ کا الزام عائد کیا گیا تھا۔

ان کے بارے میں کہا گیا تھا کہ انہوں نے کانگو سے سینکڑوں افراد کو بیلجیئم منتقل کرنے کے لئے اپنے بینڈ کو استعمال کیا۔

روانڈا کی ٹیم کے کپتان ڈیزائر نے اس سال اپنے ملک کی ٹیم کی قیادت کی تھی اور وہ افریقی ٹیموں کے فائنل تک پہنچ گئی تھی جس میں بالاخر روانڈا نے اپنے حریف کانگو کے خلاف فتح حاصل کی تھی۔

ستائیس سالہ ڈیزائر کو جمعرات کے روز اس وقت گرفتار کیا گیا تھا جب وہ ایک ٹریننگ سیشن میں تھے۔

وہ انیس سو پچانوے میں بیلجیئم آئے تھے جب ان کی عمر اٹھارہ برس تھی۔ اس سے قبل وہ ترکی بھی گئے تھے۔

انہوں نے اپنے کلب سینٹ ٹروڈن کی طرف سے ایک سو میچ کھیل کر بائیس گول کیئے۔